GIMARKAHAN sa City Government of General Santos, pangulohan ni Mayor Lorelie Geronimo Pacquiao, ang International Day for the Conservation of Mangrove Ecosystems pinaagi sa planting initiative nga nagbase sa komunidad sa Barangay Baluan.
Ang kalihukan naghatag og gibug-aton sa komitment sa siyudad alang sa "coastal protection" ug "climate resilience" pinaagi sa aksiyon nga pangkinaiyanhon.
Gipasiugdahan sa City Environment and Natural Resources Office (Cenro) ubos sa direksiyon ni department head EnP Allan Marcilla, ang kalihukan nagdani sa mga lokal nga opisyales, katambayayong nga mga pribado, tulunghaan, ug volunteers sa hiniusang paningkamot nga mabalik ang mangrove areas sa dakbayan.
Ang programa nagtutok sa pagpataas sa kaamgohan sa publiko bahin sa ecological value sa bakhawan, nga nagsilbi isip panagang nga natural batok sa coastal erosion, suporta sa marine biodiversity, ug nakatampo sa carbon sequestration.
Usa ka lektyur ang gilusad ni Princeahoy Tampus, kinsa naghatag og kinatibuk-ang mga benepisyo sa mangrove ecosystems ug naggiya sa mga nisalmot sa tukmang pagpanaum sa Bungalon seedlings.
Gipahimug-atan sa gidapit nga mamumulong nga si Hon. Ate Beth Bagonoc ang kamahinungdanon sa pag-angkon og long-term environmental stability ug pagpauswag sa kaandam sa komunidad alang sa mga risgo sa mga butang nga dunay kalambigitan sa climate.
Ang kalihukan aktibong gisuportahan sa mga opisyal sa local government gikan sa Barangay Baluan, pangunahan ni Dennis Besa ug girepresentahan ni Kagawad Ashley Alhabshi, apil usa ang mga opisyales gikan sa Barangay Buayan, pangunahan ni Rogelio Gargaritano Solis.
Ang duha ka barangay nagpadayag sa ilang komitment pinaagi sa pagsalmot ug pakig-koordinar sa aktibidad.
Nidula sab og importanteng papel ang institutional partners sa kalampusan sa aktibidad. Kini naglakip sa Department of Environment and Natural Resources, Joint Task Force (JTF) Gensan, Gentuna Canning Corporation, Rotary E-Club of Animal Welfare Advocates, MSU Graduate School SDS students, Sta. Catalina Corporation, Passionist Technological Institute, ug ang Lower Baluan Fisherfolks Association.
Ang pag-obserba sa dakbayan sa International Mangrove Day nagpakita sa mas halapad nga estratehiya ubos sa administrasyon ni Mayor Pacquiao sa pagpromotar sa malutayong kalamboan ug koserbasyon sa kinaiyahan pinaagi sa inklusibo -- community-led initiatives. (PR)