Mga duwa karon:
5:15 pm- DBTC batok UC (High School)
6:45 pm- UP batok UC (College)
Suwayan pagposte sa University of Cebu (UC) Webmasters ang ikaduha nilang sunodsunod nga kadaugan sa samang gidaghanon nga mga duwa sa ilang pagpakigbatok sa University of the Philippines (UP) Cebu Fighting Maroons sa main game ning Huwebes sa gabii, Oktubre 5, 2023, sa Cebu Schools Athletic Foundation Inc. (CESAFI) basketball college division sa Cebu Coliseum.
Ning sangkaa, grabe ka taas ang moral sa Webmasters ni coach Kern Sesante gumikan kay nasubhan sila og 74 puntos nga kadaugan batok sa Cebu Insititute of Technology-University (CIT-U) Wildcats, 109-35.
Hinuon batok sa Fighting Maroons ni coach Rommel Rasmo, gilaumang lahi na nga engkuwentro ang masugatan sa Webmasters.
Napilde man tuod ang Fighting Maroons sa nag-una nila'ng duha ka mga duwa apan nakasukol sila og insakto sa ilang mga kontra.
Sa premiro nilang tahas, ang Fighting Maroons igo lang nakawrasan sa Benedicto College Cheetahs, 65-58.
Sa ikaduha nilang tahas, ang Fighting Maroons nakasukol og maayo una sila ningyukbo sa defending champion University of the Visayas (UV) Green Lancers, 59-56.
Sa high school division, magsangka ang UC Baby Webmasters ug Don Bosco Technological Center (DBTC) Greywolves sa premirong duwa sugod sa alas 5:15 sa hapon.
Sa laing bahin, gipangmakmak sa University of San Carlos (USC) Warriors ang CIT-U Wildcats, 78-67, sa college division samtang gipangwisi-wisi sa Cebu Eastern College (CEC) Dragons ang USC Baby Warriors, 75-40, sa high school division sa mga kombati niadtong Martes, Oktubre 3, 2023. / ESL