GIPANGULOHAN ni Irish Yngayo ang Davao City secondary girls chess team aron nga modaug og tulo sa upat ka mga bulawang medalya nga gisugal sa tigi sa Davraa Meet 2019 chess nga mitapos sa Philippine Nikkei Jin Kai International School (PNKJKIS) niadtong Miyerkules.
Si Yngayo, 16, Grade 9 nga tinun-an sa University of Mindanao (UM), mitumaw nga kampeyon sa individual standard pinaagi sa pagpukan sa sama niya nga four-pointers teammate nga sila Blanche Ellyz Bongato ug Mati bet Cyhrea Ruth Atog pinaagi sa superior tie-breaks.
Ang tandem nila Yngayo ug Bongato misilhig sa standard team ug blitz team golds. Ang naulahi misungkit sab og plata sa individual blitz event.
"Lipay jud kaayo ko, nakasiyagit gani mi didto sa venue kay wala jud ko nag-expect nga modaug pa kay naa naman god koy pildi against Tagum," sulti ni Yngayo ngadto sa SunStar Davao kagahapon.
Ang magduduwa nga nakabase sa Toril sayo niini, nagpakagamay sa iyang tsansa tungod kay nagkuwang siya og saktong pagbansay alang sa regional meet. Nahingawa sab siya nga mapildi ngadto sa mga batan-ong magduduwa.
Si Yngayo, kinsa nahiluna sa ikalima sa individual blitz, nakigtigi sa iyang ikapito nga Davraa ug mopakita og akisyon sa iyang ikaunom nga Palarong Pambansa.
Samtang ang mga Dabawenyo nga sila si Kurt John Placencia ug Wesley Jovan Magbanua nakasungkit og bulawan sa secondary boys blitz chess team samtang ang panagpares sa Digos nga sila si Billy Joel Sarno ug John Perkins Aparici miangkon sa plata ug sila si Aldron Jhundell Defante ug Randolfh Mata sa Compostela Valley mibulsa sa bronse.
Apan si Sarno nakaharbat og bulawan sa secondary boys individual blitz pinaagi sa pagposte og singko puntos. Sila si Placencia ug Magbanua miiskor og "identical four points" aron nga angkunon ang sunod nga duha ka puwesto.