ANG Davao City's amateur boxing team miharus sa unom ka kadaugan gikan sa walo ka bugno, atol sa dual meet kontra boksidor sa Cabadbaran, Huwebes, sa munisipalidad sa Las Nieves, Agusan del Norte.
Ang Dabawenyong si Cyril Joshua Revilla mipildi ni Justine Araguis via unanimous decision sa kid's division 32 kilograms, samtang si Ariel Antimano sa Davao City miiskor og technical knockout victory kontra Mark Vincent Rabi sa 48 kilograms sa youth boys 46 kilograms.
Sila Joshua Padual, Wesley Caga, Alven Gonzales ug Reymond Albupera midaug sab alang sa Davao City sa tagsa-tagsa nila kaatbang.
Si Padual milabni sa unanimous decision win kontra Janbert Bernat, 60 kilograms, si Caga miangkon sa TKO win kontra Junrey Hinayon, samtang si Gonzales nakalingkawas sa split decision win kontra Felmar Antiga ug si Albupera midominar ni Kent Norbert Wacay sa 52 kilograms via technical knockout.
Sila Obet Diaño ug Roben Lanasa, napildi sa ilang tagsa-tagsa ka away.
Si Diaño miyukbo ni Rafael Cortes, 32 kilograms, samtang si Lanasa napildi kang Rafael Dagani, 64 kilograms.
Sa Facebook post ni Davao coach Librado Sagarino nakita nga midayeg siya sa iyang mga atleta, "Congrats ninyo bisag layo adto gyud ta. Insayo gyod mo pag-ayo para abot ninyo inyong pangarap."
Samtang sa Facebook interview ni Sagarino, matud niiya nga ang pag-apil sa torneyo maayong exposure alang sa mga boksidor.
"Wala nako gikuyog akong pang Batang Pinoy kay subawan sige man taligsik. Ang isa kay mahadlok maka-absent sa klase."