ANG H Team mimarka og duha ka daug sa unang larga sa Mindanao Banana Farmers and Exporters Association (MBFEA) Basketball League nga nagbukas sa Rizal Memorial Colleges (RMC) Petro Gazz Arena, sa nakalabay nga weekend.
Si Koy Espirito mikamada og 16 puntos aron aswaton ang H Team’s sa 90-53 nga kadaugan kontra Tadeco.
Si Ronald Sepe nanguna og pamuntos sa Tadeco sa siyam ka puntos.
Sa laing duwa, ang MPUJ mipukan sa ARR, 115-80, samtang ang Montaña Pawnshop miwakli sa Mafs Customs Brokerage, 80-68, alang sa kadaugan.
Ang MPUJ Crusaders, misalig sa depensa ni Migs de Loyola nga mitigum og 20 puntos.
Si Bryan Manulat misubang sa 18 puntos alang Montaña samtang si Jim Mejares may 18 puntos sab.
Ang liga gi-sanctioned sa Samahang Basketbol ng Pilipinas (SBP) 11, nagtumong nga makatigum og pundo aron makapatukod og IP classrooms.
Ang tim magduwa sa single round robin format sa eliminasyon aron madetermina ang top four tims nga moabante sa semifinals.
Ang kampeyon modawat og P50,000 samtang ang runner-up may P10,000.
Sunod duwa mobalik karong weekend.