HUMAN sa kadaugan ni Filipino boxing icon Manny Pacquiao sa iyang split decision nga kadaugan batok kang American Keith Thurman, dili ikalimod nga aduna pa siya’y saktong ikabuga nga maghatag og agianan alang sa mas dako pa nga away.
Kon hisgutan ang dako nga away, wala na seguro’y makatupong kon ang pangalan ni Floyd Mayweather Jr. maoy mahimong kontra sa Pambansang Kamao ng Pilipinas.
Masundan kaha ang 2015 Fight of the Century diin midaog si Mayweather batok kang Pacquiao pinaagi sa unanimous decision?
Alang sa American trainer ni Pacquiao nga si Freddie Roach, iyaha nang nalantawan nga mahitabo kini sa ugma damlag.
“I can’t see it,” matod ni Roach sa interbyu sa www.boxingscene.com. “Floyd’s retired and his people say there is no interest. But there will be other options.”
Si Leonard Ellerbe, chief executive sa Mayweather Promotions, mitataw sa miaging semana nga wala’y interes bisan gamay si Mayweather nga makigharong og balik kang Pacquiao.
Hinuon kon motagawtaw na ang kuwarta, dili imposible nga magkrus og balik ang dalan nila ni Pacquiao ug Mayweather.
Sa pagkakaron, nagkanayon si Roach nga dili pa angayang hasulon ang hunahuna ni Pacquiao kabahin sa kon kinsa’y sunod nga makontra niini.
Apan giklaro ni Roach nga kon siya lang magbuot, hayan wala na’y lain kon dili si Mayweather maoy ilang pilion aron iparang kang Pacquiao. Mao sab gyud kini ang tinguha sa fighting senator.
“Someone just asked me ‘What’s next?’ Well, you know what? We don’t need to think about what’s next for a while,” pasabot ni Roach. “Manny can go away and rest and we’ll think about it later on. We need to see what’s out there.”
Si Pacquiao mihatag sab og reaksyon kabahin sa posibleng ikaduha nilang away ni Mayweather.
“I don’t have an idea, my plan this time is one fight at a time,” matod ni Pacquiao.
“He’s in retirement and he’s enjoying his retirement; he’s inactive. If he’s willing to come back and willing to fight me, then at the time he will announce it, and we can say yes.”
Sa laing interbyu, si Mayweather mihatag og hamubong komentaryo kabahin sa kadaugan ni Pacquiao batok kang Thurman.
“That doesn’t surprise me. That’s Manny Pacquiao,” matod ni Mayweather, kinsa usa sa bantugang mga personalidad nga naa sa ringside sa Pacquiao-Thurman bout.