LAING player sa National Basketball Association (NBA) ang nagpositibo na usab sa coronavirus.
Si Christian Wood sa Detroit Pistons ang ikatulong NBA player nga nataptan sa maong virus, sunod nila ni Rudy Gobert ug Donovan Mitchell sa Utah Jazz.
Ang tinubdan nga wala lang una magpaila mibutyag sa The Associated Press nga si Wood wa hinuon magluya.
Si Wood na-diagnose usa ka semana human sila moduwa batok sa Utah Jazz diin permi niyang ika-match-up si Gobert.
Dili pa matino kon kining tulo ka players ang nakapakatap o nakatakod ba ngadto sa ubang players.
Gikompirmar sa Pistons nga aduna silay player nga positibo sa virus niadtong Sabado nga gibutang nila sa isolation.
"A player on the Detroit Pistons, who is under the care of team medical staff and in self-isolation since Wednesday night, was tested for Covid-19," nagkanayon ang team. "A preliminary positive result came back on March 14. The health and safety of our players, our organization, those throughout our league, and all those potentially impacted by this situation is paramount."
Gituohan sa kadaghanan nga ang coronavirus makamugna lang og mild symptons sama sa hilanat ug ubo.
Apan delikado kini sa mga edaran ug ingon man niadtong dunay mga sakit kay makapagrabi kini sa ilang kahimtang ilabi na og pneumonia.
Matod sa World Health Organization, nga kadtong dunay mga ginagmayng sakit maalim ra sulod sa duha ka semana, samtang ang dunay sakit modagan pag tulo ngadto sa unom ka semana nga pagpaalim.
Sa mainland China, diin didto nagsugod ang virus, kapin sa 80,000 ka mga tawo ang gi-diagnose ug kapin sa 58,000 niini ang naayo.
Ang NBA misugod pagsuspenso sa ilang duwa sugod niadtong Miyerkules.
Sukad niadtong Pebrero 2, maayo og gipakita si Woods sa iyang duwa ug sa 16 ka sunodsunod nilang duwa nag-average kini og 21.6 puntos, 9.1 rebounds.
Permi siyang makakolekta og kapin sa 10 puntos matag duwa.
Batok sa Jazz niadtong Marso 7, si Woods mitali og 30 puntos. Naka 32 puntos siya batok sa Philadelphia nianang pagka Marso 11.
"The darkest nights produce the brightest stars," matod ni Wood sa iyang Instagram sa sayong bahin ning semanaha.
Sa iyang comment iya usab nga gisukip ang hulagway nga naghansak siya sa bola atubangan ni Gobert, ang kasamtangang defensive player of the year ug ang sakop sa All-Star sa karon nga season.
Si Wood nakaduwa sab sa Philadelphia, Charlotte, New Orleans ug Milwaukee.
Moabot na ngadto sa kapin 169,000 ka mga tawo sa tibuok kalibutan ang nataptan sa nahisgutang virus ug sobra 6,000 ang namatay.
Gikataho nga sa matag adlaw nagkasaka ang mga nataptan niini.
Sa US moabot na ngadto sa 51 ang nangamatay ug aduna na usay 2,100 ang giingon nataptan.(SunStar Davao)