GIBUTYAG nga ang bag-ong nadakpan nga mga rebelde sa Philippine National Police sa Caraga mga miyembro gayud sa New People's Army (NPA).
“Mga kauban nako sa una,” butyag ni Jam Saguino, Kalinaw Davao de Oro adviser kinsa kanhi usab secretary sa NPA Guerilla Front (GF) 20 atol sa Defense Peace Corps press conference sa Royal Mandaya Hotel, sa dihang gipangutana bahin sa iyang alyansa uban sa mga miyembro sa gitawag og “Jaguar 8” nga nadakpan atol sa hiniusang AFP-PNP law enforcement operations sa Barangay Bunawan Brooke ug Barangay San Teodoro, Bunawan, Agusan del Sur niadtong Hunyo 13, 2025.
Sumala ni Saguino nga ang mga nasikop nga gitawag og “Jaguar 8” gibansagan sab sa pipila ka sektor isip “Agusan 8.”
Mga nadakpan mao sila Charisse Bernadine Bañez, alyas “Nikki,” secretary sa Southern Mindanao Regional Committee (SMRC) sa NPA; Ronnie Igloria, alyas “Gideon,” vice commanding officer; Louvaine Erika Espina, alyas “Pam,” medic of the unit; Sinag Lugsi, alyas “Jomilyn”; Larry Montero, alyas “Laloy”; Daryl Man-Inday, alyas “Tonton”; Arjie Guino Dadizon, alyas “Ronron” ug Grace Niknik Man-aning, alyas “Jelyn.”
Matud ni Saguino nga kanunay siyang nakiglambigit kang Igloria sa dihang nabalhin siya sa Guerilla Front (GF) 20 ug kuyog nga nagtrabaho gikan 2014 hangtud 2017.
Dugang pa ni Saguino nga iyang nailhan si Bañes isip kauban nga student council officer sa University of the Philippines sa dihang nagkahimamat atol sa general assembly sa tanang mga student council officers sa UP system.
“And at that time she was already a member of the Communist Party of the Philippines. Ako pud that time member na sa Communist Party of the Philippines. From 2009 to 2011, nagkauban mi balik sa National Executive Committee sa Anak Bayan kay si Nikki was our national secretary general; ako pud ang national vice chair for Mindanao sa Anakbayan,” yagyag niya.
“And that time we were already, again, members of the Communist Party of the Philippines. Dili lang Anakbayan; dili lang KM (Kabataang Makabayan), kon dili mga kadre jud sa Communist Party of the Philippines,” pahimug-at niya.
Nasayran na lang ni Saguino nga si alyas Nikki gipadala sa Mindanao, naghiusa sa Sub-regional Committee (SRC) 5 sa GF 56 isip iyang unang unit of assignment nga gilangkuban sa Kitaotao ug Quezon sa probinsiya sa Bukidnon, ug sa Marilog areas sa Davao City padulong sa San Fernando, Bukidnon, sa Pantaron Range.
Gitumbok niini ang pahayag sa Anakbayan Southern Mindanao Region (SMR) ug Karapatan SMR, bahin sa gitawag og Jaguar 8, isip “a lie” kay wa kini reperensiya ngadto sa NPA, bahin sa ilang pagka-armado, o sa ilang pagka-miyembro sa CPP apan gihulagway silang “human right defenders”.
“Among big questions kanunay nganong sila man ang tig-panalipod if naay madakpan nga NPAs,” pasibaw niya nga pangutana atol sa press conference.
Sa dihang dunay pagduaw sa mga pamilya sa prisohan sa Jaguar 8 niadtong Hunyo 25, nakadungog matud pa si Saguino nga nag-istorya uban sa ilang pamilya bahin sa nahitabong engkuwentro sa mga hilit ug utlanan nga mga lugar sa Surigao del Sur sa Caraga Region.
“If they were part of the encounter, dili diay sila NPA? So nganong naa sila sa encounter? So contradicting kaayo ang statements sa mga front organizations,” pahayag niya. (PR)