GITIN-AW ni Davao City Mayor Sebastian “Baste” Duterte nga ang nahitabo kang kanhi Presidente Rodrigo Duterte (FPRRD) nagpausbaw og “serious concerns” bahin sa proseso ug "rule of law" sa nasud.
Si Sebastian, sa iyang pahayag niadtong Martes 14, 2025, nagsulti nga ang kakuwang sa pagkasihag (transparency) ug nagsalikway sa legal nga mga sumbanan nagtakda og peligrong paninugdan.
Matud niya nga kung kini nahitabo sa kanhi presidente, unsa ang proteksiyon aron magseguro alang sa ordinansyong molupyo.
Sumala pa niya nga ang Konstitusyon sa Pilipinas nabutang karon sa pagsulay sa samang mga tawo kinsa gituohan nga molaban niini ug ang gahum karon nga gigamit aron hadlukon ang mga kontra sa politika inay nga magprotekta sa mga tawo.
“Now more than ever, I will not be silenced. This is not just about the attack against my family -- it is about every Filipino who values justice and fairness. This is not just a question of legal procedures -- it is a grave matter of upholding the integrity of our institutions and safeguarding our nation’s sovereignty,” pahayag niya.
Kahinumdoman nga si Rodrigo ug kanhi Philippine National Police (PNP) chief nga karon Senador Ronald “Bato” Dela Rosa gipailawom sa imbestigasyon sa International Criminal Court (ICC) tungod sa gialegar nga "crime against humanity" sa Pilipinas gikan Nobyembre 2011 hangtud Marso 2019 sa dihang giimplementar ang drug on war ni FPRRD.
Gidakop si FPRRD sa Metro Manila niadtong Marso 11 ug gihatud ngadto sa The Hague, Netherlands.
Gibutyag ni Sebastian sa paghinabi niadtong Huwebes sa gabii, Marso 13, 2025, nga niadto siya sa Manila aron nga moaplay og visa ngadto sa Netherlands, sa paglaum nga iyang mabisita ang iyang amahan samtang duna pay higayon.
“Gusto ko makakita sa akoang amahan samtang buhi pa siya kay ang akoang amahan tiguwang na 79 anyos, mag birthday pa na karun petsa 28,” tataw niya.
Iyang gipadayag nga ang panglawas ni FPRRD peligro na karon ilabi na sa iyang edad. Apan giangkon sa mayor nga wala pa siyay katikaran sa kasamtangang kondisyon sa iyang amahan.
Iya sab nga giawhag ang mga tigsuporta nga di mabalaka, nagtambag kanila nga manguli ug ikonserba ang ilang enerhiya alang sa umaabot nga mga kalihukan.
Samtang wala pa masayud bahin sa sunod nga lakang sa administrasyon ni Ferdinand Marcos Jr. kay nagtuo siya nga magpadayon sila sa ilang paningkamot batok sa ilang pamilya.
Samtang gibutyag sab ni Sebastian nga nakadawat sila og "verified information" nga nagpagawas og search warrants alang sa puluy-anan ni FPRRD, Sebastian, ug iyang mga igsuon nga si Vice President Sara Duterte ug First District Representative Paolo “Pulong” Duterte.
Matud niya nga kini nga akisyon mao ang pagpanghilabot sa ilang pribadong espasyo ug naghatag og kabalaka kon unsa gyud ang tumong.
Puno pa niya nga ang Police Regional Office-Davao Region (PRO-Davao) hugot nga nanghimakak sa maong lakang apan tungod sa ilang "inconsistent statements" bahin kang FPRRD, ang katawhan dunay katungod nga mangutana sa kamatuoran nga nagdugang sa nagkataas nga kabalaka sa pagpanghasi ug intimidasyon.
Gihulagway ni Sebastian nga ang nahitabo karon sama sa Martial Law bisan og wala gyud opisyal nga deklarasyon.
Busa giawhag niya ang matag Pilipino nga pabilin nga maigmaton, angay nga masayud, hibaw-on ang ilang mga katungod, ug pangandam nga panalipdan ang mga kaugalingon.
Sulti niya nga kini ang panahon nga mobarong nga lig-on, protektahan ang matag usa gikan sa pagpangabuso sa gahum, ug magseguro nga way Pilipino mahabilin nga bulnerable.
Tug-an sa mayor nga ilang gibuhat ang tanan aron nga mabalik sa Pilipinas si FPRRD.
Iyang gipahimug-atan nga ang ilang gibuhat di lang alang sa Pilipinas apan sa matag Pilipino nga naglisud tungod sa kakabus, inhustisya, ug huyang nga liderato.
“The people’s call for justice and accountability cannot be ignored. Their voices will not be silenced. We will stand together -- united, resolute, and unyielding in our pursuit of truth and justice,” matud niya.
Samtang mga suporter ni FPRRD nihimo og vigil gawas sa ilang panimalay sa Doña Luisa Subdivision sa Davao City gabii niadtong Marso 13.
Daghang mga suporter naghanyag sa ilang mga pag-ampo ug nagsindi og mga kandila isip suporta kang kanhi presidente. Kini nahitabo human dunay istorya nga ang balay ni FPRRD rondahon.
Mga silingan ug suporter sa kanhi president nagtigum gawas sa iyang balay ug nanagsinggit og “Marcos Resign!” ug uban nagsul-ob og sinina nga dunay mensahe nga “I Stand with FPRRD” ug gihatag sab ngadto sa mga suporter ni Duterte gawas sa ilang balay.
Apan gihimakak sab sa PRO-Davao ang pag-angkon nga dunay himuong ronda sa pulis sa balay ni Duterte apan bisan pa niini, mga suporter nisaad nga magpabilin ug magbantay.
Gikanayon ni Police Major Catherine Dela Rey, PRO-Davao spokesperson, nga mga indibiduwal kinsa naa sa gawas sa balay ni FPRRD gitugtan tungod kay ila kining katungod. Apan mga pulis naa ra sa duol aron nga magbantay.
“Ang mga gina-provide nga security sa PRO-Davao specifically sa Ecoland Police Station diha duol sa iyang balay kanunay man ug wala gitanggal sukad sa una,” butyag niya sa paghinabi sa PTV-Davao.
Usa ka silingan ni kanhi Presidente nigawas sa ilang balay aron nga ipakita ang iyang suporta alang kang FPRRD. Gitin-aw sa silingan nga kung ang nasudnong kagamhanan nagmalampuson sa pagdetiner kang Rodrigo busa kini molugdang ngadto sa martial law.
“I am a victim of martial law also kaya ayoko iparanas sa mga bata na ito, sa mga apo ko. If I will die, then I will die basta hindi lang matuloy ang mga Marcos na iyan,” matud niya.
Usa sa mga abogado sa pamilyang Duterte kinsa nibalibad nga panganlan, nagtambag sa mga suporter nga di mosupak kung ang pulis moimplementar og posibleng search warrant sa ilang balay.
Matud niya nga ang search warrant maoy usa ka legal nga dokumento, busa kinahanglan nga irespeto bisan og unsa pay gibati sa publiko kay di sila buot og kagubot.
“Mohangyo ko sa atoang tanan kung pwede inig mangabot ang police ayaw, dili nato bawalan, katungod nila ang mag-serve ug processes sa gobyerno,” hangyo sa abogado. (Rojean Grace G. Patumbon)