GIPAHIBAWO sa City Transport and Traffic Management Office (CTTMO) ang temporaryo nga pagsira sa pipila ka mga dalan alang sa mahitabong miting de avance sa Hugpong sa Tawong Lungsod (HTL) ugmang adlawa, Mayo 9, 2025.
“Alang sa ipasiugda nga miting de avance karong May 9, 2025, magsugod sa alas 8:00 ug magpadayon hangtud mahuman ang aktibidad. Pakisubay sa imahe alang sa alternatibong mga ruta,” butyag sa CTTMO sa ilang Facebook post kagahapon, Miyerkules, Mayo 7, 2025.
Pipila sa mga dalan nga sirad-an mao ang C.M. Rector Avenue gikan sa Palma Gil Street padulong sa Magsaysay Avenue. Unya sa Magsaysay Avenue gikan sa C.M. Recto Avenue hangtud sa C. Bangoy Street, kanhi nailhang Ponciano Street. Ang C. Bangoy Street gikan sa E. Quirino Avenue padulong sa Palma Gil Street sirad-an sab.
Mga dalan sirad-an alas 8 sa buntag sa Mayo 9, 2025, hangtud pagkahuman sa programa. Mga drayber ug motorista inay nga modiretso sa C.M. Rector Avenue, gitambagan sila sa pagliko sa Palma Gil Street.
Ang buhatan nagsulti sab nga sugod alas 8 sa buntag hangtud 12 sa tungang gabii, tanang mga behikulo nga padulong sa C. Bangoy Rotonda kinahanglan nga moliko pawala sa C.M. Recto Avenue ug moliko patuo padulong sa Palma Gil Street.
Giabisohan sab sa CTMMO ang tanang mga sakyanan nga padulong Rotonda sa C. Bangoy nga moliko pawala sa E. Quirino Avenue, unya tuo na sab sa Daang Maharlika Highway ug tuo na sab sa Palma Gil Street. Dunay two-way traffic sa CM. Recto Avenue gikan sa kanto sa Magsaysay Avenue padulong sa Palma Gil Street.
Gibutyag ni City Transport and Traffic Management Board Representative Atty. Eduardo Perez IV nga mopakatag sila og 114 hangtud 150 ka personahe alang sa tibuok kalihukan.
Ang pagsira subay sa Resolution No. 04256-25 series of 2025 ug sa City Ordinance 0807-25 series of 2025.
Sa Facebook post, gipahibawo sa HTL nga magpahigayon sila og miting de avance sa alas 3 sa hapon sa Mayo 9, uban sa ilang senatorial slate apil na sa ilang mga kandidato alang sa pagka-konsehal ug kongresista sa una, ikaduha, ug sa ikatulong distrito. (Rojean Grace G. Patumbon)