MAS gipahugtan sa Davao City Police Office (DCPO) ang pagpatuman sa mga safety protocols taliwala sa nagpadayong Kadayawan Festival sa Davao karong tuiga.
Kini usa ka lakang aron maseguro ang kaluwasan sa tanang motambong sa dagkong kalihukan sa lungsod.
Sumala ni Police Captain Hazel Caballero Tuazon, ang tigpamaba sa DCPO, nga padayon ang ilang pagbantay ug implementasyon sa mga polisiya.
Gihisgutan niya nga hugot nga pagmonitor sa kapulisan sa mga crowd area, labi na sa mga venue diin asa ang mga aktibidad.
Giingon sab ni Tuazon nga aduna gihapon mga butang nga ginalimitahan dalhon sa mga event area apil niini ang mga bladed weapons, backpack, ug mga tumbler nga dili transparent.
Gihangyo sa DCPO ang kooperasyon sa publiko aron malikayan ang kalit nga mga insidente ug aron mapabilin ang pagpatunhay sa kahusay ug kalinaw.
Gikan pa sa pagsugod sa Kadayawan, hugot na ang presensiya sa kapulisan sa matag eskina ug sulod sa mga event grounds.
Gipaneguro ni Tuazon nga andam ang DCPO sa pagtubag sa bisan unsang kalit nga panghitabo, labi na sa pinaka-highlight nga mga aktibidad sama sa Indak-indak sa Kadalanan ug Pamulak sa Kadayawan nga ipahigayon karong Dominggo, Agosto 17, 2025.
Sa laing bahin, andam na usab ang City Transport and Traffic Management Office (CTTMO) sa pagdumala sa dagan sa trapiko ilabi na sa adlaw sa mga street events.
Gibutyag nga may pipila ka mga dalan nga sirhan sa buntag pa lang, busa gipasidan-an ang publiko nga magplano og sayo sa ilang biyahe.
Ang dakbayan sa Davao nagpadayon sa hapsay ug malinawon nga selebrasyon sa Kadayawan 2025 tungod sa kooperasyon sa mga residente, mga bisita, ug kahugot sa seguridad.
Gipasalamatan sa DCPO ang katawhan sa ilang pagsabot ug suporta sa ilang mga lakang alang sa kasegurohan sa tanan. (Jeepy P. Compio)