Kagawad gitodas sa paryente

Kagawad gitodas sa paryente
Hulagway iya sa Midsayap Municipal Police Station

AWAY sa pamilya ang gilantaw sa mga awtoridad nga hinungdan sa pagpusil-patay sa barangay kagawad alas 9:00 sa buntag, Martes, Nobyembre 1, 2023, sa Midsayap sa probinsiya sa Cotabato.

Giila ang biktima nga si Suharto “Doc” Antilino, 35, minyo ug bag-o pa lang naproklama nga nidaug sa pagka-kagawad sa Barangay Poblacion 3, Midsayap.

Gibutyag ni Midsayap Chief of Police Lieutenant Colonel John Miridel Calinga nga nagtindog lang ang biktima duol sa barangay hall sa nahisgutang lugar sa diha nga nahiabot ang ig-agaw niini nga si Omar Antilino.

Nag-istorya pa ang biktima ug suspek sa dihang kalit silang nagkalalis nga misampot sa pagpamusil gamit ang kalibre .45 nga pistola.

Abtik nga miikyas ang suspek sakay sa iyang motorsiklo paingon sa Maguindanao del Sur. Samtang patay diha-diha dayon si Suharto kinsa naigo sa ulo ug likod nga bahin.

Gilutos na sa mga pulis sa Midsayap Municipal Police Station ang suspek aron atubangon ang kasong ipasaka batok kaniya.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph