COTABATO CITY -- Patay ang usa ka barangay kagawad, samtang talandugon ang kahimtang sa drayber niini human sila gibanhigan, alas 2:15 p.m., Abril 29, 2024, didto sa Maguindanao Del Sur.
Ang biktima mao si Juanito Promboy, barangay kagawad sa Tuayan 1, Datu Hoffer Ampatuan, Maguindanao Del Sur.
Samtang angol ang drayber niini nga si Ronald Angit nga taga Barangay Timanan South Upi Maguindanao Del Sur.
Sakay ang biktima ug drayber niini sa usa ka motor, ug samtang nagbaybay sa dalan sa Barangay Tuayan paingon unta sa Barangay Limpongo, mibutho ang mga armadong lalaki, dayon gipaulanan sila og bala sa M16 armalite rifles.
Misarasay ang motor human maigo ang mga biktima, samtang mga suspek, abtik nga miigting palayo sa lugar.
Mga samaron gipangdala sa Maguindanao Provincial Hospital apan gideklara sa mga doktor si Promboy nga dead on arrival samtang grabe si Angit nga nabulit sa daghang pinusilan.
Makuting imbestigasyon labot sa krimen gilusad na sa kapulisan. (EEF)