GIDAYEG ni Police Regional Office-Davao Region acting Regional Director Police Brigadier General Leon Victor Z. Rosete ang nagmalampuson nga hiniusang anti-illegal drug operation sa Philippine Drug Enforcement Agency-Davao de Oro, uban ang uban pang yunit sa kapulisan gikan sa Nabunturan Municipal Police Station, 1st ug 2nd Davao de Oro Provincial Mobile Force Company ug Provincial Intelligence Unit niadtong Oktubre 23, 2024.
Ang maong operasyon niresulta sa pagkapuhag sa drug den ug pagkasikop sa upat ka mga high-value individuals (HVIs), apil na ang drug den maintainer nga nahan-ay isip numero unong Provincial Taget List (PTL) nga nailhan nga si alyas Ruel sa Purok 3, Barangay Anislagan, Nabunturan, Davao de Oro.
Atol sab sa paglusad sa operasyon, nasakmit ang pipila ka plastic sachets nga dunay gisuspetsahang sulod nga shabu nga dunay standard drug price nga P142,800. Apil nga nasakmit sa lugar mao ang drug paraphernalias ug uban pang non-drug nga mga gamit.
Ang gipalig-on nga kampanya sa PRO-Davao Region nga anti-illegal drug nahisubay sa direktiba ni Philippine National Police Chief Police General Rommel Francisco D. Marbil nga recalibrated strategy batok ilegal nga druga nga nagtumong sa ugat sa suliran nga nagtutok sa pagpuhag sa supply chains ug nagtarget sa mga tinubdan niini inay sa mga street-level pushers ug users lamang. (Wenz G. Mendoza)