Lokal Kasikas: Dabawenyos gilingaw sa French Film Fest

NA-ENJOY ug mas nasayran sa mga Dabawenyos ang kultura sa France, pinaagi sa 24th French Film Festival nga misikad, Hunyo 28 ngadto 30 sa Abreeza Cinemas.

Nahimong posible ang kalihukan uban sa Film Development Council of the Philippines (FDCP), Cinematheque Centre Davao, ug Embassy of France to the Philippines and Micronesia.

Sa nakalabay nga tulo ka adlaw, 11 ka award-winning nga pelikula ang gipasalida atol sa libre nga special screening.

Kini ang Dans la Brume (Just a Breath Away), La Promesse de l’Aube (Promise at Dawn), Band de Filles (Girlhood), Le Grand Bain (Sink or Swim), Madame Hyde (Mrs. Hyde), Le Grand Méchant Renard (The Big Bad Fox), Mes Provinciales (A Paris Education), Jusqu’à la garde (Custody), Le Brio, In Bed With Victoria, ug Barbara.

Si French Embassy audiovisual attaché Martin Macalintal nagkanayon nga ang pagpahigayon sa film festivals maoy labing sayon aron ipromotar ang langyaw’ng kultura.

“Movie is the easiest way to promote culture because through the different stories, we can see the different values of a certain society,” ni Macalintal.

Giangkon niyang may pagduha-duha sa mga Pinoy nga molantaw sa French films tungod sa impresyon nga sila sopistikado ug elitista.

Ang French Film Festival gihimo sab sa Cebu (Hunyo 20 ngadto 22) ug sa Bacolod karong Hulyo 10 ngadto 12.