“THERE is nothing wrong if one day you will realize you are not meant for that vocation,” kini ang bulawanong pulong nga nahimong rason aron si Norman Solis mahimong abogado, ug makamugna og dakong impact sa kinabuhi sa uban.
Si Fiscal Solis, Davao del Norte chief prosecutor, nagtungha og Philosophy sa Oblates of St. Joseph Major Seminary sa Lipa, Batangas ug Theology sa Don Bosco Center of Studies sa Parañaque.
Nag-istar siya sa seminaryo sud sa walo ka tuig, isip preparasyon sa iyang kurso nga mahimong pari, tungod nagtuo siyang kini ang “calling” alang kaniya.
Sud sa walo ka tuig, mibati siya og kahadlok ug kabalaka tungod sayod siyang di sayon ang mahimong pari.
Apan sa tabang sa iyang spiritual adviser, nakahunahuna si Solis nga iduso ang laing kurso nga alang niya mas makatabang sa uban ug sa iyang adbokasiya.
Mikuha siya og Business Administration dayon mi-proceed sa kursong pag-abogado sa Ateneo de Davao University.
Nahimo siyang abogado human mipasar sa eksam, 1997.
Unang nagsilbi si Solis sa Public Attorney’s Office sa Davao Region dungan ang paghimo sa mga “pro bono services.”
Hangtud miserbisyo siya sa mga lumad sa Saranggani Province.
Siya ang unang nagsilbi kanila isip public lawyer ug nanguna sa pag-establisar sa attorney’s office sa probinsiya, 2000.
“Gitan-aw nako ang sitwasyon sa atong mga lumad didto, wala gyud sila’y abogado, na-attach lang gud sila sa GenSan, muadto pa sila’g GenSan, lisod kaayo.”
Sa kasamtangan, ang Sarangani Provincial Government nakapahimulos sa institutionalized District Attorney’s Office tungod ni Solis.
Apan tungod buot niyang mobalik sa Davao tungod buot sa iyang anak nga motungha dinhi, mibalik siya sa PAO, diin gikuptan niya ang Panabo ug Tagum districts.
Nagsilbi siya og unom ug tunga sa tuig.
2005, girekruta siya nga mahimong fiscal sa Tagum City, apan miabot ang oportunidad, gihimo siyang usa sa prosecutors sa Davao del Norte.
Nagsilbi siya isip Tagum City fiscal ug Davao del Norte Provincial fiscal.
Nahimo siyang OIC provincial prosecutor sa Davao del Norte ug natudlo nga Provincial Chief Prosecutor sa 2010.
Si Solis usa sa miyembro sa Inter-agency Council Against Trafficking in Davao Region (Iacat-Davao).
Napili man siya nga mahimong kabahin sa grupo, niya, gimahal niya ang trabaho tungod sa adbokasiya nga pagtabang sa kababaihan ug kabataan.
Si Chief Prosecutor Solis kasamtangang may labing daghan nga nakumbikta nga trafficking cases sa Pilipinas, rason nga ang Iacat-Davao nahimong awardee atol sa Iacat National Awards sa unang higayon.
“Our consolation in working with the council is when we rescue the minors and we successfully prosecute the perpetrators to give lesson to the public that trafficking is not a good business because it’s a modern day slavery. Imagine, (employing) small children and women, mostly, for a cheap fee?” suma niya.
Siya malaumon nga usa ka adlaw tanang sektor mas ma-edukar labot trafficking in persons aron wa nay kabataan o kababaihan nga mahimong ulipon sa modernong panahon.