SA nakalabay nga Lunes, Marso 18, ang Filipino Academy of Movie Arts and Sciences (Famas) mipaguwa sa listahan sa pelikula, filmmakers, ug mga aktor nga nominado sa 67th Famas Awards.
Ubos sa short film category, tulo ka pelikulang ginama sa mga Dabawenyos ang apil sa listahan: (1) Siyudad sa Bulawan (City of Gold) ni Jarell Serencio; (2) Pulangui ni Bagane Fiola; ug (3) Sa Among Agwat (In Between Spaces) ni Don Senoc.
Ang Siyudad sa Bulawan ni Serencio istorya sa tulo ka magsuong nanginahanglang og kwarta, nanarbaho sa minahan sa Mt. Diwalwal nga wa igsapayan ang ka-delikado nga pwede nilang kaabtan.
Ang short film, bag-uhay lamang midaug sa CineFilipino 2018 isip 2nd Best Short Film – Open Category.
Midaug sab kini as Best Film sa 1st Palawan International Film Festival.
Ang Pulangui ni Fiola, istorya sa duha ka magsuong lalaki nga nagkabuwag.
Ang Pulangui gipasidunggan nga Best Film Award ug Best Sound Award sa 16th Mindanao Film Festival, Disyembre 10, 2018.
Samtang ang Sa Among Agwat ni Senoc, istorya sa mag-uuma nga si Jun, nga nagpuyo sa tamnanan og pinya uban ang inahang si Dita ug igsuong si Mako.
Ang iyaan niya gikan Manila nga way anak, nagtanyag nga sagupon si Mako uban ang saad nga hatagan siya sa tawhay nga kinabuhi.
Ang short na-shortlist sab sa Ca’Foscari Short Film Festival IX sa Venice Italy.
Ang Famas Awards himuon sa Abril 28 sa Meralco Theater.