DEAR Noy Tikyo,
Nag-email ko nimo ning akong problema aron nga imo kong matambagan.
Usa ko ka working student. Tungod sa kapit-os sa akong ginikanan, kaugalingong paningkamot ang akong gihimo aron nga makaeskuwela ug makatapos og degree.
Sukad pa gyud sa akong pagka-high school, nakatungha ko tungod sa akong kaugalingong pagkayud. Karon kay 2nd year college na ko.
Ang akong problema karon bahin ning 45 anyos nga biyudo nga akong gikahimamat. Nagkaila mi sa restawran nga akong gitrabahoan. Tungod kay kanunay siyang magkan-anan sa akong gitrabahoan, nagkasuod mi ug mitanyag nga siyay mopatiwas nako.
Karon uyab na mi kay ako siyang gisugot. Siya na sab ang nagbayad sa akong tuition fee sa eskuwelahan ug uban pang galastuhan.
Namatud-an nako nga buotan siyang pagka-biyudo kay ako na sab nga naila-ila ang iyang mga anak nga kaedad ra sab nako.
Tungod sa iyang kabuotan, misamot ko og ka-in love niya.
Sakto ba ko sa akong desisyon nga sugton siya bisan sa gilay-on sa mong edad? Di kaha ko magmahay? Please tambagi ko.
Lyka
*****
Lyka,
Wa may dautan sa inyong paghinigugmaay kay biyudo na man siya ug ikaw dalaga pa. Di man importante ang gintang sa inyong mga edad, kon di diha sa inyong pagsinabtanay sa usag-usa. Unsaon man nang sama ra nimo og edad apan di mo magkasinabot, di ba?
Apan para nako sa pagkakaron, mas maayo nga makahuman ka una og eskuwela una ka modesisyon nga magminyo. Maayo man god tong duna kay credentials aron nga makakita ka og maayong trabahyo ugma damlag ug makatabang sa mamahimo nimong pamilya.
Puriso, hinay-hinay lang una samtang wala ka pa makatapos og eskuwela.
Tingali nakasabot sab siya niini ug mopaabot og pipila na lang ka tuig.
Pila ra man nang tulo ka tuig kay dali na man kaayo ron ang pagtuyok sa panahon. Dinhi sab nimo masukod kon tinud-aray ang iyang gugma nimo. Kon tinud-aray siya sa iyang tinguha nimo, segurado ko nga makapaabot siya.
Manghinaut ko nga magmalipayon mo sa inyong relasyon karon. Ug mas maayo nga kamong duha magmaalampuon ug ihalad ang inyong panaghigugmaay ngadto sa Ginoo.
Noy Tikyo