GIKONSIDERA karon sa bag-ong napahimutang nga hepe sa Vice Regulation Unit (VRU) ang mas higpit nga kampanya batok sa "vaping" pinaagi sa informative drive sa mga tulunghaan.
Si Police Lieutenant Jacy Jay B. Francia (Ret.) nagtug-an sa Madayaw niadtong Lunes nga ilang palig-unon ang pakigtambayayong uban sa Department of Education (DepEd), nga kabahin na sa Vices Task Force nga molusad og mga symposiums nga gitumong sa mga tinun-an.
“Ang sa vape man gud na-observe nato nga estudyante kasagaran nagagamit og vape. Ang akong intervention ana kay we will conduct symposiums sa schools and we will tap speakers from City Health Office,” matud ni Francia kon diin dugang nagkanayon nga makigtambayayong sila uban ang DepEd aron pagseguro sa hapsay nga implementasyon sa information drive.
Gitin-aw ni Francia nga ila sab nga pakusgan ang pagpanakop sa tiggamitan nga madakpan nga nag-vape sa publiko.
Ilawom sa giamendahan nga Smoking Ordinance o Ordinance No. 0472-24 Series of 2024, kadtong nag-vape sulod sa mga gidili nga mga lugar mag-atubang og multa nga P3,000 alang sa unang kalapasan.
Matud niya nga ang ilang buhatan, gawas sa pagtumbok sa mga kabatan-onan sa info-drive sa vape, nagsusi sa mga datus sa mga citation tickets ug nagsubay sab sa mga edad sa mga nadakpan tungod sa paggamit og vape sa gidiling mga lugar.
Tinguha ni Francia nga ipaklaro ang "public awareness" sa Amended Smoking Ordinance ug ang Liquor Code of Davao City, nga nalakip sa "liquor ban and sobriety".
Tinguha sab niyang palapdan ang information drive ngadto sa barangay level , sa pakig-alayon ubana ng Barangay Cultural Communities Affairs Division. (CIO-Davao)