ARON palig-unon ang pakigkombati sa padayong isyu sa "bullying" sa tulunghaan, gihingusgan sa Police Regional Office-Davao Region (PRO-Davao) ang ilang paningkamot aron mapatas-an ang kaamgohan ug ipatuman ang Republic Act 10627, labing nailhan isip “Anti-Bullying Act of 2013.”
Sa tibuok unang kuwarter sa tuig, gilusad sa PRO-Davao ang 107 ka lektyur ug symposiums sa primary, secondary, ug tertiary nga mga tulunghaan sa rehiyon, nagtumong sa pagmugna og luwas ug mas way gipili nga "learning environments."
Ang kampanya, nga namugna nga kabahin sa mas halapad nga saad sa mga awtoridad sa pagprotekta sa kabataan ug pagpakiglambigit sa komunidad, nagtutok sa pag-edukar sa mga tinun-an, magtutudlo, ug administrador sa tulunghaan bahin sa implikasyon sa bullying ug ang kaimportante sa mutual respect sulod sa institusyon sa edukasyon.
Pinaagi sa panagsandurot nga panaghisgut ug gamit ang tinuod nga hitabo sa kinabuhi, mga misalmot nakakutlo og bililhong ideya kung unsaon sa bullying mapadayag ug unsaon kini epektibo nga mahatagan og pagtagad.
Sumala sa PRO-Davao, ang intensibo nga educational campaign nagpakita og maayong resulta. Hinuon, gitaho sa buhatan nga way natala nga insidente sa bullying sa ilang hurisdiksyon atol sa unang kuwarter sa 2025, usa ka dakong timailhan sa inisyal nga impak sa inisyatibo.
Si Brigadier General Leon Victor Rosete, regional director sa PRO-Davao, nagpahimug-at sa kaimportante sa padayon nga pagmaigmaton ug paglambigit sa komunidad.
“Bullying is a serious issue that can have lasting effects on victims. We encourage everyone -- parents, teachers, classmates, and concerned citizens -- to speak up and help protect everyone,” panawagan niya.
Dugang pang panawagan ni Rosete sa publiko nga itaho ang bisan unsang kadudahan nga insidente sa bullying ngadto sa pinakaduol nga police station, aron mahatagan og gibug-aton ang away batok sa bullying nagkinahanglan og hiniusang aksiyon.
Suban sa kamandoan ni PNP Chief General Rommel Francisco Marbil, ang ahensiya subling nagmatuod sa ilang komitment nga padayonon ang pagmonitor sa mga kasong bullying ug iseguro ang proactive law enforcement.
Isip kabahin sa ilang holistic approach alang sa kaluwasan sa komunidad, padayon ang PRO-Davao sa pagpalig-on sa ilang papel dili lang isip tigpatuman sa kalinaw apan isip bililhong kauban sa pagtukod og nasyon ug pagprotekta sa kabataan. (David Ezra Francisquete)