POLITIKA ang gilantaw sa mga awtoridad nga motibo sa engkuwentro sa mga armadong grupo nga nagsugod alas 8:00 sa buntag hangtud alas 2:00 sa hapon, Sabado, Mayo 10, 2025, sa Pandag, Maguindanao del Sur Province.
Sa maong hitabo, namatay ang usa ka kandidato nga nailhan nga si Embran Tumba Mamalinta o mas naila nga Mengko Mamalinta, 40- anyos, kandidato pagka-konsehal sa Pandag ug lain pang tulo ka mga tawo.
Sumala sa tigpamaba sa Police Regional Office-Bangsamoro Autonomous Region (PRO-BAR) nga si Police Lieutenant Colonel Jpy Ventura nga nagka-engkuwentro ang grupo nila Mengko batok sa ilang mga kaaway sa Brgy. Pandag, Pandag sa maong probinsiya na milungtad og tulo ka oras.
Tungod niini, daling mihikling ang mga sibilyan paingon sa luwas nga mga dapit aron nga di maapil sa kagubot. Nahunong lang ang pinusilay sa dihang nahiabot ang puwersa Pandag Municipal Police Station, Special Action Force sa PNP, ug militar.
Atol sa clearing operation sa mga sundalo ug pulis, nadakpan ang pito ka mga suspek apil na ang upat ka miyembro sa Barangay Peacekeeping Action Team (BPAT).
Nakuha sa ilang posisyon ang upat ka M16 armalite rifles, duha ka kalibre 30 M1 Garand rifles, usa ka M14 rifle, mga bala ug magazines.
Balhog ang mga suspek sa prisohan sa Pandag MPS alang sa tukmang disposasyon. (Edgar E. Fuerzas)