GIPAILAWOM sa imbestigasyon ang usa ka kandidato sa pagka-bise mayor sa Nabunturan, Davao de Oro ug incumbent nga barangay kapitan tungod sa giingong "vote buying" alang sa taliabot nga National and Local Elections (NLE) gitakda sa Mayo 12, 2025.
Kini human nga mga awtoridad nakasakmit sa 22-wheeler truck nga nagkarga og mga sinakong bugas nga gitahong giapud-apod gawas sa balay sa barangay kapitan sa Purok 6, Barangay Manat niadtong Martes, Mayo 6, 2025.
Sumala kang Police Major Catherine Dela Rey, tigpamaba sa Police Regional Office-Davao Region (PRO-Davao) atol sa Davao Peace and Security Press Corps media briefing niadtong Miyerkules, nitubag ang Nabunturan Municipal Police Station (MPS) bahin sa taho gikan sa duha ka nagpakabana nga molupyo bahin sa puti nga Howo trailer truck, nagkarga og mga bugas alang sa personal nga pag-apud-apod.
“So na-confiscate nato tong truck nga gikargahan sa mga bugas and then pag-abot sa pulis nanagan dayon tong naglinya nga mga tawo nga mo-receive sa maong bugas,” saysay sa opisyal.
Inisyal nga imbestigasyon sa pulis nagbutyag nga mga saksi niangkon nga ang pag-apud-apod gipasayon sa personal secretary sa barangay kapitan ug mga sakop sa Barangay Police o Civilian Volunteer Organization (CVO).
Gikompirma ni Dela Rey nga mga awtoridad nagbana-bana nga ang truck gikargahan og 2,500 ka sakong bugas. Ug mga 1,000 ka sako na ang naapud-apod una niabot ang mga pulis, samtang 1,500 ka mga sako sa bugas ang nasakmit isip ebidensiya.
Samtang ang drayber sa truck giaresto samtang mga bugas ug truck gitanggong sa Nabunturan MPS alang sa dokumentasyon ug dugang imbestigasyon.
Mga awtoridad nagsubay ug nag-ila na karon sa uban pang mga indibiduwal nga nalambigit aron pasakaan og kaso, apil ang kandidato mismo.
Kasamtangan, ang hitabo makonsidera nga kalapasan sa Comelec Resolution No. 11104, nga nagdili sa paggamit og "public or private resources, including food packs, financial assistance, or similar forms of aid" alang sa electoral advantage atol sa kampanya ug panahon sa eleksiyon.
Gitumong ang resolusyon nga mapugngan ang "vote buying", nga gilatid isip "any act of giving, offering, or promising money or anything of value" aron pagdani sa bisan kinsa aron botohan o batokan ang usa ka kandidato.
Kung mapamatud-an, ang maong aksiyon moresulta sa "disqualification" sa kandidato, pagpasaka og kasong kriminal, ug pagkapriso, ilawom sa Omnibus Election Code of the Philippines.
Ang kaso kasamtangang gisusi aron nga madeterminar kung ang pag-apud-apod og bugas "politically motivated" ug dunay koneksiyon sa kandidatura sa politiko. (David Ezra Francisquete)