PERSONAL nga dumot ang gituohang motibo sa pagpusil sa kandidato sa pagka–board member sa unang distrito ning probinsiya kinsa girapido sa duha ka wala mailhing suspek sa Delfina Village, kilid sa simbahan sa Church of Jesus Christ of Latter-day Saints sa Barangay Magugpo North, Siyudad sa Tagum alas 11:00 sa gabii, Abril 29, 2025.
Ang biktima giila nga si Audrie Biadog Perez, 43-anyos, minyo, ug molupyo sa Delfina Village, Barangay Magugpo North.
Base sa inisyal nga imbestigasyon, nasayran nga ang biktima angkas sa single nga motorsiklo samtang naglabigar sa dalan, apan pag-abot sa maong dapit, girapido sa wala mailhing suspek sa makadaghang higayon gamit ang wala matinong kalibre sa armas.
Ang biktima nakahiagom og daghang samad pinusilan sa nagkadaiyang parte sa lawas samtang ang drayber sa motorsiklo nawad-an og kontrol hinungdan nga nabalintong ug nahagbong.
Hinuon, giingon nga ang drayber nakadagan ug nakatago samtang ang suspek misakay og laing motorsiklo nga gimaneho sa wala mailhing lalaki dayong misibat palayo paingon sa wala masayring direksiyon.
Giingon nga sa pagresponde sa mga pulis sa dapit, ang biktima nadala na ngadto sa Tagum Doctors Hospital pinaagi sa asawa niini nga si Renalyn Ruada Perez alang sa hinanaling medikasyon.
Narekober sa mga pulis gikan sa crime scene ang lima ka basiyo sa bala sa gituohang .45 caliber pistol.
Sa follow-up nga imbestigasyon, nasuta nga anaa na sa luwas nga kahimtang ang biktima apan padayon pa kining gitambalan sulod sa ospital.
Padayon pa ang imbistigasyon sa pulis sa maong insidente . (Dexter T. Visitacion)