COTABATO CITY -- Nagpasalamat ang tsirman central committee sa Moro Islamic Liberation Front (MILF) ug pinaka-lider sa United Bangsamoro Justice Party (UBJP) nga si Ahod Balawag Ebrahim ug si Bangsamoro Chief Minister Abdulrauf Macacua sa mga misuporta sa kandidatura ni Datu Ali Midtimbang nga naproklamar sa Commission on Elections (Comelec) nga maoy mananaug sa gobernador sa Maguindanao del Sur Province niadtong Martes, Mayo 13, 2025.
Naproklamar nga gobernador si Midtimbang sa nahisgutang probinsiya,
Martes, Mayo 13, 2025.
Nidaug sab ang running mate ni Midtimbang nga si Ustadz Hisham Nando nga bise gobernador sa probinsiya.
Si Ebrahim ug Macacua parehong mga opisyal sa MILF ug sa ilang rehiyonal nga partido, ang UBJP.
Gipildi ni Midtimbang si reelectionist Maguindanao del Sur governor Mariam Sangki Mangudadatu, kansang bana nga si Suharto, mas nailhang Teng Mangudadatu, nidagan pagka-gobernador sa Maguindanao del Norte Province apan naparot batok kang Tucao Mastura.
Si Mastura ug ang iyang running mate nga si Marshall Sinsuat naproklamar na sa Comelec nga pulos mga kandidato sa UBJP sa pagka-gobernador ug bise gobernador sa Maguindanao del Norte Province.
Daug sab si kanhi Maguindanao governor ug congressman Esmael “Toto” Mangudadatu nga kandidato sa UBJP batok kang incumbent congressman Tong Paglas. (Edgar E. Fuerzas)