GIKONDENA ni Cotabato City Mayor Bruce Matabalao ang pagpanglabay og granada sa kapilya alas 10:45 sa buntag, Dominggo, Mayo 19, 2024, sa Cotabato City.
Mga naangol giila nga sila Maribel Atis ug lain pang usa ka babaye nga padayon pang giila samtang gisuwat ning balita kagahapon.
Gibutyag ni Cotabato City Police Office Director Querubin Manalang Jr. nga gihimo ang Kasaulogan sa Pulong (KSP) sulod sa Santo Niño Chapel sa Barangay Rosary Heights 3 sa dakbayan apan kalit lang duha ka wala mailhing tawo ang niitsa og granada sa kapilya.
Nakita sa mga nagtambong sa KSP ang granada nga niligid sulod sa kapilya mao nga abtik silang nigawas apan naabtan gyud sa pagbuto sa eksplosibo ang duha ka babaye.
Abtik sab nga niikyas ang mga suspek sakay sa usa ka motorsiklo.
Andam nga mohatag og reward money si Mayor Matabalao sa makaila ug makatudlo sa mga suspek alang sa dali nga pagkasikop kanila sa mga awtoridad.
Kapulisan sa Cotabato City padayon nga nag-imbestiga sa maong hitabo.