Kapitan, asawa gi-ambush, patay

POLITIKA ang gitan-aw nga motibo sa mga awtoridad sa pagpamanhig-patay sa kapitan ug sa secretary sa barangay alas 10:30 sa gabii, Dominggo, Agosto 18, 2024, sa Sultan Kudarat sa Maguindanao del Sur.

Giila ang mga napatay nga sila si Barangay Bulibod Kapitan Esmael Latip Mustapha ug barangay secretary nga iya mismong asawa nga si Rahima Maulana Mustapha.

Gibutyag ni Sultan Kudarat Chief of Police, Lieutenant Colonel Esmael Madin, nga naglakaw lang ang magtiayon gikan sa usa ka okasyon ug pauli na unta sa dihang nahitabo ang pagpamanhig kanila.

Sumala pa nga wala mailhing armadong mga lalaki ang nipaarak kanila og mga bala hinungdan sa ilang kamatayon.

Giingong patay gilayon ang magtiayon samtang ang mga suspek nanibat paingon sa hilit nga dapit sa Sultan Kudarat.

Daghan ang nagtuo nga dunay kalabutan sa nagsingabot nga plebisito sa Septyembre ang pagpatay sa mga nahisgutan.

Nasayran nga ang munisipyo sa Sultan Kudarat gisugyot nga tungaon sa duha hinungdan nga pagabotohan.

Imbestigasyon sa kamatayon sa kapitan ug asawa niining secretary padayon nga giimbestigahan sa kapulisan sa Sultan Kudarat Municipal Police Station. (EEF)