Karnaper nakigpinusilay sa pulis; 1 napatay, 2 angol

Karnaper nakigpinusilay sa pulis; 1 napatay, 2 angol
(Hulagway gikan sa President Quirino Municipal Police Station)

TACURONG CITY -- Nagtingkagol sa prisohan ang duha ka karnaper samtang usa nila ka kauban napatay sa nahitabong pinusilay tali sa mga tinugyanan sa balaod alas 2:15 sa hapon, Lunes, Mayo 6, 2024, sa probinsiya sa Sultan Kudarat.

Nailhan ang napatay nga si alyas Arih samtang ang mga naangol mao sila Bohari Basco ug Oman Aliman.

Gibutyag ni Police Regional Office Soccsksargen (PRO 12) Director Brigadier Augustus Placer nga buot unta nga ilugon sa mga suspek ang Suzuki Raider 150 nga motorsiklo sa off duty nga sundalo nga si Sergeant John Acosta Valdez sa Barangay Suben, President Quirino, Sultan Kudarat Province.

Apan abtik nga nakabantay si Valdez nga nisum-ok sa kabalayan ug nangayo'g pakitabang sa mga sibilyan hinungdan nga napusoy ang mga suspek ug nibalik sa ilang giagian.

Ang nagrespondeng kapulisan sa President Quirino Municipal Police Station naggukod kanila apan inay nga mosurrender, nakigpinusilay hinuon ngadto sa mga awtoridad.

Patay si alyas Arih samtang samaran ang duha niini ka mga kauban hinungdan nga nangadakpan.

Gibantayan ang mga samaron nga suspek sulod sa balay tambalanan aron nga maimbestigahan pa samtang ang patay nga lawas ni alyas Arih gikuha na sa pamilya niini. (EEF)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph