GITAHO sa City Health Office (CHO) Tropical Division ang pagkubos sa ihap sa namatay tungod sa dengue, gikan 18 sa panahon gikan Enero 1 hangtud Mayo 31, 2024, ngadto sa 12 sa samang higayon karong tuiga, 2025.
Gisulti ni Melodina Babante, coordinator sa CHO Tropical Division, nga ang ilang buhatan pasiunang nakatala og 16 dengue-related deaths. Apan sa dugang gihimong pagsusi nagbutyag nga ang upat niini tungod sa leptospirosis.
Gitaho sab niini ang pagkubos sa mga kaso sa dengue, uban ang 1,682 ka mga kaso nga natala sukad Hunyo 2025, itandi sa 1,942 atol sa samang panahon niadtong 2024.
Sumala sa buhatan nga kadaghanan sa pasyente sa dengue mga bata nag-edad og singko hangtud nuybe anyos, diin ang kasagaran nga kaso mga lalaki, moabot og 855 ka kaso.
Giila ni Babante ang mga barangay nga dunay pinakataas nga ihap sa kasong dengue, naglakip sa Barangay 76-A, kon diin kasamtangang way dengue task force. Gisundan kini sa Buhangin, kon diin giesplikar sa buhatan nga dunay daghang mga dumuduong nga molupyo; Talomo Proper, nga bag-ohay lang naka-establisar na sa ilang dengue task force; Tibungco; Calinan; Catalunan Grande; Matina Crossing; Cabantian; ug Maa, ug daghan pang uban.
Giawhag sa CHO ang tanang mga barangay sa siyudad nga mag-establisar sa ilang kaugalingon nga dengue task force aron nga makatabang sa pagpakubos sa ihap sa mga kaso sa ilang mga lugar. Dugang ni Babante nga sukad Hunyo 2025, 58 sa 182 ka barangay duna nay aktibong dengue task forces, dunay paglambo gikan 35 niadtong 2024.
Gipahimangnoan sa CHO ang publiko nga tagaan og citation tickets ang mga malapason sa City Ordinance No. 0401, Series of 2020, nga nagmando sa tanang mga barangay nga magmugna og kaugalingon nilang Barangay Mosquito-Borne Diseases Task Force (BMDTF).
Mga malapason sa Section 16 sa ordinansa masilotan: P1,000 multa ug duha ka adlaw nga community service alang sa unang kalapasan, P3,000 ug upat ka oras nga community service alang sa ikaduhang kalapasan, ug P5,000 ug upat ka oras nga community service alang sa ikatulong kalapasan.
“Kita ang solution sa problema, ang katawhan sa Davao City ang solution kay naa sa atoa nakasalalay ang dako nga task o buluhaton para matagaan nato ug solusyon ang dako nga problem kay perenial problem ang dengue,” matud niya atol sa ISpeak media, Huwebes sa buntag, Hunyo 26, 2025, sa City Mayor’s Office (CMO).
Gidasig sab sa CHO ang publiko nga kanunayon ang pagpraktis sa 5S strategy nga mao ang Search and Destroy, Self-Protection, Seek Early Consultation, Support Fogging, ug Sustain Hydration, aron motabang sa pagkombati sa dengue sa siyudad.
Ang buhatan mag-obserba sab karong bulana isip National Dengue Awareness Month, uban sa tema nga “Kada alas kuwatro tayo’y gumalaw. Tayo’y mag-4Ts araw-araw.” (Rojean Grace G. Patumbon)