GIAWHAG ni Veronica "Kitty" Duterte ang mga suporter ni kanhi Presidente Rodrigo Duterte nga pabiling positibo ug hatagan og prayoridad ang ilang panglawas ug ibalewala ang mga negatibo nga mga istorya bahin sa ilang pamilya sa dihang nakigkulokabildo kini Dominggo sa gabii, Marso 23, 2025.
Ang anak nga babaye ni kanhi FPRRD personal nga namulong sa mga suporter sa ilang balay sa Dona Luisa Subdivision, Matina, Davao City, nga nagpadayag sa iyang pagpasalamat ug pagdasig.
Init sab siyang gihangop sa mga suporter ug nagpahimug-at sa kaimportante nga magtutok sa taliabot nga eleksiyon.
"Wag na natin silang patulan. Doon na lang tayo bumawi sa eleksyon." awhag ni Kitty.
Iya sab nga giila ang suporta gikan sa Overseas Filipino Workers (OFWs), kinsa nagpasiugda og mga tigum aron nga mag-ampo ug protest rallies sa nagkalain-laing mga kanasuran.
"Sa mga OFW, maraming maraming salamat po sa inyong lahat. Malaking bagay ito para sa akin at sa pamilya ko kasi wala kaming hinihingi—dasal niyo lang at suporta, yun lang, okay na kami doon,” dugang pa niya.
Subling gisulti ni Kitty nga ang tumong sa iyang pamilya nga mapauli og balik ang iyang amahan dinhi sa Davao City, ug naghangyo sa mga suporter nga padayon lang ang ilang pagsuporta.
Samtang sa The Hague, Netherlands, nipasalig si Vice President Sara Duterte sa mga suporter nga ang iyang amahan pabiling kompiyansa sa iyang legal defense sa International Criminal Court (ICC).
"The former president is confident he has no case to answer," matud ni Sara Duterte atol sa tigum sa mga suporter sa Het Malieveld, The Hague, sayo ning semanaha.
Nihatag sab siya og katikaran sa panglawas sa iyang amahan, ug nagsulti nga maayo ang kondisyon niini human sa nasinati niini kakapoy ug pagkabuyong atol sa iyang unang pag-atubang sa ICC sa pagdungog.
"He's very confident about the legal arguments. He's very confident… that what they did was not wrong and that there is no case to begin with," sulti niya.
Kasamtangan, ang 79-anyos nga kanhi presidente nag-atubang og kasong "crimes against humanity" nga dunay kalambigitan sa iyang kontrobersiyal nga war on drugs, nga giingong nikalas og daghang kinabuhi matud pa sa nagkadaiyang human rights groups.
Naghuwat sab si Duterte og kompirmasyon sa mga kaso niini sa Septyembre 23 kon diin mahatagan siya og higayon nga supakon ang mga akusasyon batok kaniya. (Cine Grace Languay, DorSU Intern)