COTABATO CITY -- Posibleng politika ang motibo nga gilantaw awtoridad sa pagpusil patay sa bag-ong nidaug nga konsehal sa lungsod alas 3:15 sa hapon, Miyerkules, Mayo 28, 2025, sa Datu Piang, Maguindanao del Sur Province.
Giila ang biktima nga si Thong Mamasalanao Asim, 56 anyos, minyo, ug konsehal sa Datu Piang.
Gibutyag ni Maguindanao del Sur Police Provincial Office (MDSPPO) director, Police Colonel Ryan Bobby Paloma, nga sakay ang biktima sa iyang motorsiklo duol na sa iyang gipuy-an sa Barangay Poblacion, Datu Piang, giatngan kini og wala mailhing mga armadong lalaki ug gipusil.
Patay gilayon si Asim human makaangkon og pinusilan sa ulo, likod, dughan ug tiyan samtang mga suspek dali nisakay og duha ka motorsiklo ug nisibat paingon sa hilit nga dapit sa Datu Piang.
Nasayran nga ang biktima nidaug isip ikaupat nga municipal councilor sa Datu Piang niadtong May 12 midterm election.
Gihingusgan na karon sa kapulisan sa Datu Piang Municipal Police Station ang imbestigasyon sa pagpusil patay sa biktima. (Edgar E. Fuerzas)