KRITIKAL ang kahimtang sa usa ka mag-uuma nga gipahit sa King Cobra o banakon alas 10:00 sa buntag, Miyerkules, Hunyo 25, 2025, sa South Cotabato.
Giila ang biktima nga si Reneboy Sabio, 49-anyos, minyo, ug nagpuyo sa Purok 2, Barangay Talisay, Lake Sebu, South Cotabato.
Samtang nakalingkawas ang pag-umangkon sa biktima human makadagan sa dihang niatake ang banakon.
Matud ni Eddie Sabio nga tua sa uma ang iyang uyoan, uban ang pag-umangkon niini sa dihang kalit lang gipaak sa tuhod human matumbi ang ikog sa banakon.
Gigukod sa banakon ang pag-umangkon ni Sabio apan nidagan ug naluwas.
Abtik nga nagresponde ang mga paryente ug silingan ni Sabio hinungdan nga ila sab nga napatay ang King Cobra.
Gidala ang mag-uuma sa South Cotabato Provincial Hospital sa Koronadal City ug giingong anaa sa kritikal nga kahimtang sa dihang gisuwat ning balita.
Awhag sa lokal nga panggamhanan sa Lake Sebu sa mga mag-uuma ug molupyo nga mag-amping gyud kon tua sa uma ilabi na sa mga dapit nga sagbuton batok sa Banakon. (Edgar E. Fuerzas)