ISIP regular nga movement sa kapulisan sa Davao City Police Office (DCPO), mipahigayon kini og lahugay sa mga station commanders adlawang Biyernes, Abril 19, 2024.
Ang lahugay gipangunahan mismo ni DCPO Director Police Colonel Richard Bad-ang.
Gibutang ni Bad-ang isip station commander sa San Police Station 2 si Police Major Michael Uyanguren, hulip kang Police Major Marvin Hugos.
Si Hugos gibutang sab isip station commander sa Bajada Police Station 18, hulip kang Police Major Antonio Luy.
Samtang si Luy na ang bag-ong station commander sa Buhangin Police Station 5 hulip kang Police Major Joenel Pederio.
Si Pederio ang gibutang isip bag-ong station commander sa Toril Police Station hulip kang Police Captain Marlon Donquilab nga gibutang isip deputy police station commander sa San Pedro Police Station.
Sumala sa DCPO nga usa kini ka regular nga movement sa hanay sa kapulisan aron maseguro nga mahatagan og kahigayonan ang uban nga anaa sa ubos nga ranggo. (Jeepy P. Compio)