NAGSUGYOT ang City Economic Enterprise (CEE) og dugang seksiyon sa Agdao Public Market aron nga makaakomodar og mga bakanteng puwesto.
Gisulti ni Leandrie Rose Presoris, market supervisor sa Agdao Farmers Market, nga duna pa'y mga bakanteng puwesto sa daghang mga seksiyon sa ikaduhang andana.
Tungod niini, gisugyot nila ngadto sa komite sa merkado nga ang maong lugar himoan og laing seksiyon nga maglakip sa "spa, barbershop, ticketing office", ug uban pa nga serbisyo.
“We already proposed for the resectioning para mapagamit, maparentahan nato sa mga interesado pud to,” matud niya sa dihang nahinabi uban ang Davao City Disaster Radio (DCDR) Miyerkules, Hulyo 30, 2025.
Matud niya nga tungod kay ang merkado nagsugod og operasyon sa iyang bag-ong pasilidad, niabot na kini sa ilang tinuig nga target nga kita.
Tin-aw ni Presoris nga ang Phase 3 sa konstraksiyon sa merkado nagpadayon pa, nga naglakip sa taas nga andana ug pipila ka lugar sa silong. Wala pa sila'y target petsa kung kanus-a matapos, kay padayon pa silang naghuwat alang sa dugang pundo aron nga makaaginod.
Iya sab nga gisulti nga tungod sa padayong konstraksiyon, ang eatery section padayon ang operasyon sa karaang gambalay sa merkado. Kon mahuman na, ibalhin kini ngadto sa ikaduhang andana sa bag-ong pasilidad. Iya sab nga gisulti nga ang "walkalator" sa merkado nga kaniadto gigamit apan kasamtangan nga gipailawom sa "maintenance".
Giklaro ni Presoris nga ang bayad nga abang sa mga puwesto sa bag-ong Agdao Public Market nagpabilin nga mao ra gihapon. Ang napanlantawan nga pagtaas sa abang tungod kay ang bag-ong giabangan nga puwesto mas dako itandi kadtong naa sa karaang pasilidad.
Gisulti sab niya nga daghang local government units (LGUs) nga nipahigayon og "benchmarking" ang nibisita sa Agdao Public Market ug niila niini isip model market alang sa ubang mga lugar.
Gisugdan ang operasyon sa bag-ong pasilidad sa Agdao Public Market niadtong Nobyembre 15, 2023. (Rojean Grace G. Patumbon)