DALING mitahan sa kapulisan sa Digos City Police Station ang babaye nga suspek sa pagdunggab-patay sa iyang kapuyo human nga siya giselosan.
Ang insidente nahitabo alas 10:20 sa gabii, Biyernes, Abril 26, 2024 didto sa Purok Riverside, Barangay Zone 1, Digos City
Giila sa Digos police ang biktima nga si alyas Bert, 46, samtang ang suspek ang kapuyo niini nga si alyas Karen, 36, pulos nagpuyo sa nasampit nga dapit.
Una niini, nagtagay ang duruha og ilimnong makahubog, ug human sa pagtagay, nakadesisyon na unta sila nga mamahuway, apan wala kini nahitabo dihang nagtaas ang ilang pag-inistoryahay.
Sa taas nga istorya giingong nagkainit ang ilang mga gihisgutan, diin ang biktima nakabati na og pagselos, hinungdan nga giingong nakulatahan ang suspek.
Pagkahuman sa pagpangulata, gilayong mikuha og kotsilyo ang biktima diin gihulga niya ang iyang kaipon nga patyon kini.
Sa maong higayon, dayon nailog ni Karen ang kotsilyo diin sa way pagduha-duha iyang gidunggab sa makadaghang higayon ang iyang kaipon nga maoy nahimong hinungdan sa hinanaling kamatayon niini.
Nadala pa sa balay-tambalanan ang biktima, apan gideklara kining dead on arrival.
Giproseso na sa Digos police ang pagpasaka og kasong homicide batok sa suspek. (Jeepy P. Compio)