DAVAO DEL NORTE -- Nag-unay pagkutlo sa kinabuhi ang lalaki kinsa maoy giingong nagpatay sa kaugalingong amahan kinsa niuwang sa away sa magtiayon sa Purok 25, Sitio Milyong, Barangay Sto. Niño, Talaingod.
Sumala pa nga ang insidente wa gilayon napahibalo ngadto sa kapulisan sa Talaingod Municipal Police Station gumikan sa gilay-on sa dapit nga nahitaboan.
Gibutyag nga Hulyo 15, 2024, alas 8:50 sa buntag, dihang si Alma Mariano Manday-Onan, 26 anyos, minyo ug molupyo sa nahisgutang dapit, nagpahibalo sa Talaingod police kabahin sa insidente.
Matud pa nga sa pagkadawat sa maong taho, kapulisan sa Talaingod police gilayong gidulong ang dapit aron sa pagsusi niini.
Apan sa ilang pag-abot sa dapit giingong nalubong na ang suspek lakip ang amahan niini nga napatay subay sa tinuhoan ug tradisyon sa pamilya.
Nasayran pinaagi sa asawa sa suspek nga si Analyn Manit, 20 anyos, nga niadtong higayona alas 7:00 sa buntag, Hulyo 11, 2024, nag-andam siya og pamahaw sa suspek nga iyang bana nga si Pakira Mariano, 28 anyos, mag-uuma, apan niulbo ang ilang panaglalis.
Matud pa nga samtang nagbinayloay sila sa mga mahait nga pulong, ang suspek nga iyang bana, mikuha’g sundang ug gitigbas si Analyn nga maayong pagkaigo sa walang bukton.
Sa dihang nakita sa ugangang lalaki ni Analyn nga si Balayman Mariano, 67 anyos, ang gibuhat sa suspek ngadto kang Analyn, gisulayan niini og pugong ang suspek apan mao na man hinuon ang gitigbas gamit ang samang sundang.
Human ang gihimong pagpatay sa amahan, ang suspek nga si Pakira Mariano nagpakamatay usab pinaagi sa paglaslas sa iyang liog.
Si Analyn niadtong higayona, matud pa, nanawag og tabang ug gidala sa mga silingan ngadto sa Kapalong District Hospital apan gibalhin pagdala sa Davao Regional Medical Center alang sa dugang medikasyon.
Gisulti ni Purok Chairman Nalda Modesto, 50 anyos, nga human sa maong hitabo, gilubong dayon ang duruha ka mga patay’ng lawas subay sa tinuohan ug tradisyon sa pamilya.
Giingon nga ang maong insidente giareglo na pinaagi sa tribal court. (Dexter T. Visitacion)