Lalaki napriso sa 10 kaha sa yosi

GIKUSTODIYA sa Panabo City Police Station ang lalaki nga giindorso sa usa ka negusyante kinsa nakasakop niini nga nanikwat og sigarilyo sa Panabo Public Market, Barangay New Pandan, siyudad sa Panabo alas 11:30 sa buntag, Sabado.

Ang suspek giila nga si Arnel Danao Fernandez, 21-anyos, ulitawo, laborer, ug molupyo sa Purok 5, Evacon, Barangay Tubod, Carmen sa maong probinsiya.

Gibutyag nga ang suspek giindorso sa tag-iya sa tindahan nga si Angel Bert Tato Ortojan, 33-anyos ngadto sa Panabo City Police Station.

Matud pa nga ang suspek nasakpan ni Ortojan nga nangawat og kinaha nga mga sigarilyo sa iyang tindahan sa Panabo Public Market.

Ug tuod man, narekober gikan sa posisyon sa suspek ang napulo ka kaha nga Winston Red nga sigarilyo nga gibana-banang nagkantidad og Php 1,280.

Kasamtangang giandam ang tukmang kasong ipasaka batok sa suspek nga anaa sa kustodiya sa Panabo City PNP, uban sa mga ebidensiya nga narekober gikan kaniya. (Dexter T. Visitacion)