DUNAY kasong murder ang 18 anyos nga lalaking napalgang patay daplin sa dalan sa didto sa Tagum City, Marso 20, 2024, nga alas sais sa buntag.
Kahinumduman nga nayagaw ang mga molupyo sa Purok Garciaville, Mankilam sa Tagum human makita ang usa ka lalaking hubo sa iyang t-shirt, nakapantalon ug nagbuy-od kini sa dalan.
Suma sa Investigation and Detective Management Section sa Tagum Police, pag-abot nila sa dapit, wala na kini pulos ug nakita nga may samad pinusilan.
Ang biktima nga molupyo sa lugar giila nga si alyas Marawi, 18 anyos.
Dugang impormasyon gikan sa kapulisan nga mismong amahan sa biktima nagkanayon nga ang anak niya nalambigit sa pagpanunggab niadtong 2020.
Giaresto kini sa kasong murder apan nadismissed suma pa ang kaso tungod wala miatubang ang reklamante.
Nakuha gikan sa crime scene ang 2 ka baseyo sa gi tuohang .45 nga pistol ug upat ka balinis.
Imbestigasyon sa krimen nagpadayon sa kasamtangan. (Dexter T. Vsitacion)