DAGHANG mga local government units (LGUs) sa Davao Region ang nag-awhag sa ilang mga molupyo nga magpalayo sa dagat ug nagsuspende sa mga klase tungod sa gilaumang tsunami nga dunay gitas-on nga usa ka metro tungod sa magnitude 8.7 nga linog nga nitay-og sa Kamchatka, Russian.
Daling nagkarakara sa pagpangandam ang LGUs og pagkaon, medisina, ug mga kahimanan pang-emerhensiya samtang naka-standby usab ang ambulansya.
Kini subay sa abiso nga tsunami sa Philippine Institute of Volcanology and Seismology (Phivolcs), ilabi na kadtong coastal areas nga nag-atubang sa Pacific Ocean Miyerkules sa buntag, Hulyo 30, 2025.
Nasayran nga daling nangabot Miyerkules ang mga evacuees gikan sa coastal barangay sa San Agustin sa Sta. Maria, Davao Occidental ngadto sa mga evacuation center human ang abiso nga tsunami alert sa Phivolcs.
Gihangyo sa mga opisyal ang katawhan nga magpabiling alerto ug sundon ang mga direktiba sa mga awtoridad.
Daghan sab nga lugar sa Davao Region ang apektado, usa na niini ang Davao City, diin gisuspende sa Philippine Coast Guard ang tanang biyahe sa mga sakyanang pandagat paingon ug gikan sa Samal Island sugod ala 1 sa hapon ug gidid-an usab ang pagpangaligo og dagat ug bisan unsang aktibidad sa kadagatan.
Miyerkules sa udto, gisuspende ang face-to-face nga klase sa mga eskuwelahan nga nahimutang sa mga coastal barangay sa Davao City ug nibalhin sa blended learning isip lakang sa pagpangandam human sa gipagula nga tsunami advisory sa Phivolcs, Miyerkules, Hulyo 30, 2025.
Sa Davao del Sur, gipasabot sa Provincial Disaster Risk Reduction ang Management Office (PDRRMO) nga kanselado ang klase sa coastal municipalities sa Sta. Cruz, Hagonoy, Padada, Sulop, Malalag ug sa pipila ka barangay sa Digos City.
Ang Digos City, pinaagi sa Executive Order No. 35, gisuspende ang klase ug ang pag-report sa mga teaching ug non-teaching staff sa coastal barangays sa Sinawilan, Cogon, Aplaya ug Dawis.
Sa Davao Occidental ug Davao Oriental, temporaryong gibawal ang pagpanagat, pagpangaligo og dagat, ug paglawig. Giawhag ang katawhan nga magpalayo sa baybayon ug mamalhin sa mas taas nga lugar.
Samtang sa Panabo City, Davao del Norte, gisuspende usab ang klase sa coastal areas isip precautionary measure.
Total class suspension usab ang gipatuman sa probinsiya sa Davao Oriental, diin suspendido ang klase sa tanang lebel sa tibuok Davao Oriental, lakip na ang pagsirado sa mga beach resorts ug coastal government offices. Gihangyo sa provincial government nga likayan ang baybayon ug sundon ang mga advisory sa lokal nga disaster response teams.
Sumala sa Phivolcs advisory, gilauman ang minor tsunami wave height nga moabot og usa ka metro tali sa ala 1:20 hangtud alas 2:40 sa hapon. Giklaro sa ahensiya nga dili kini makaguba og dagkong estraktura apan posible kini magpadayon sulod sa pipila ka oras.
Ang panawagan sa awtoridad, gipaigmat ang tanang coastal residents sa Mindanao nga magpabiling alerto, magpakabana, ug mag-amping alang sa kaluwasan sa matag usa.
Nimando ang Department of the Interior and Local Government (DILG) sa pagpabakwit sa mga molupyo nga naa sa daplin sa kadagatan human nga nagpagawas og "tsunami warning" Phivolcs.
Ang kusog nga linog nakamugna og tsunami nga moabot og 13 ka tiil ang gitas-on, ug miigo sa kabaybayonan sa Russia.
Gilauman nga ang Japan maoy sunod nga ig-on sa mga balod nga kapin 9 ka tiil ang gitas-on. Unya human sa Japan, tsunami moabot pa sa Hawaii ug Alaska ug pinisik nga mga dagkong balod dinhi sa Pilipinas. Hinungdan nga mga tawo nga nanimuyo sa daplin sa dagat gipasidan-an nga magpabiling alerto, mosunod sa safety instructions, ug moadto sa mas taas nga lugar kung imando.
Giawhag sa DILG ang local government units nga manguna sa himuong pagbakwit sa mga komunidad nga duol sa dagat sa mga mosunod nga probinsiya Miyerkules: Batanes Group of Islands; Cagayan; Isabela; Aurora; Quezon; Camarines Norte; Camarines Sur; Albay; Sorsogon; Catanduanes; Northern Samar; Eastern Samar; Leyte; Southern Leyte; Dinagat Islands; Surigao del Norte; Surigao del Sur; Davao del Norte; Davao Oriental; Davao Occidental; Davao del Sur; ug Davao de Oro.
Gimando sab sa DILG ngadto sa mga LGUs nga iimplementar ang "critical preparedness measures, activate emergency operations centers and incident management teams, immediately establish evacuation routes, directional signs, and safe zones for communities at risk," ug makig-alayon uban ang regional ug provincial disaster risk reduction and management offices, Phivolcs, ug uban pang hingtungdang mga ahensiya alang sa technical support, risk assessments, ug public awareness campaigns. (Uban sa taho sa SunStar Philippines)