Liboan ka tawo nibakwit sa DavNor, DavOro

NAKULGOT. Ang hulagway didto kini sa National Road sa Brgy. Guadalupe, Tuganay, Carmen, Davao del Norte.
NAKULGOT. Ang hulagway didto kini sa National Road sa Brgy. Guadalupe, Tuganay, Carmen, Davao del Norte. Screenshot sa video sa PDRRMO Davao del Norte Drone Team

DAVAO REGION -- Liboan na ka mga tawo ang namakwit sa Davao de Oro ug sa Davao del Norte gikan sa ilang mga pinuy-anan tungod sa way puas nga pagbundak sa ulan sugod pa niadtong Dominggo, Enero 28, 2024.

Nasayran nga sa lungsod sa Monkayo, Davao de Oro, mikabat na og 1,487 ka mga indibiduwal ang namiya sa ilang mga panimalay aron sa pagseguro sa kaluwasan sa ilang kinabuhi.

Subay sa datus nga natala, sukad alas 7 sa gabii, Enero 30, 2024 , mga bakwit gikan sa Brgy. Mt. Diwata mokabat na ngadto 713 ka mga indibiduwal o 231 ka mga pamilya samtang sa Brgy. Pasian anaa na sa 372 ka mga indibiduwal, Brgy. Rizal 231 ka mga indibiduwal, Olaycon, 62 ka mga indibiduwal, Barangay Upper Ulip 55 ka mga indibiduwal, Brgy. Casoon nga anaa sa 21 ka mga indibiduwal ug pinakagamay nga mga bakwit nga anaa sa 13 ka indibiduwal o upat ka mga pamilya gikan sa Brgy. Naboc.

Samtang sa probinsiya sa Davao del Norte, sukad alas 6 sa buntag, Enero 31, 2024, subay sa taho gikan sa Disaster Risk Reduction and Management Office (DRRMO), ang Saug Dam sa lungsod sa Asuncion anaa na sa alert level 1 ug inanay nga misaka ang tubig samtang ang Libuganon Dam sa lungsod sa Kapalong ug Pagsabangan ug Magupising sa Brgy. Dujali anaa pa sa normal nga level.

Giingon nga sa maong oras ang Brgy. Pagsabangan ,Brgy. San Miguel  ug Brgy. Guadalupe sa maong lungsod padayon pa gihapong maagian sa tanang matang sa mga sakyanan.

Dugang gibutyag nga sugod pa lang niadtong adlaw’ng Lunes suspendido na ang klase sa mga tulunghaan sa Davao de Oro samtang sa siyudad sa Tagum, kagahapon pa lang gisugdan ang pagsuspende, Enero 31, 2024.

Gilauman nga ang maong pag-ulan nga  hatud sa “Shear Line” padayong masinatian sa Davao Region. 

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph