Libreng durian, gibaha

NAGPUNSISOK ang katawhan sa usa ka dapit sa probinsiya sa Cotabato gumikan sa gidalit nga libre nga pagkaon og durian nga way limit hangtud nga matagbaw.

Sa usa ka umahan sa Sitio Bagong Silang, Barangay San Vicente, Makilala, Cotabato Province, dili na kinahanglang mag-inilugay sa pagkaon sa durian. Ug wa na kinahanglana nga magdala pa og dagkong salapi aron nga makapalit niini kay libre na nga mokaon sa "hari sa tanang mga prutas."

Tagbaw gyud ang tanan kay gawas nga way limit, libre pa nga ipakaon kini sa mga tawo nga mobisita sa lugar.

Ang patakaran lang nga kinahanglan nga sundon mao ang pagdala og pambuak sa prutas ug kinahanglan sab nga kolektahon ang liso sa nahurot nimo og kaon nga durian ug itunol ngadto sa tag-iya.

Ug ang ikatulo nga patakaran mao nga tanan makapatuyang og kaon niini basta walay high blood o alta-presyon.

Ang liso sa maong prutas himuong semilya sa tag-iya, ibaligya o ipangtanum nila og balik sa ilang uma.

Kahinumdoman nga kantidad og P1.7 milyon ang gigahin sa lokal nga panggamhanan sa Kidapawan nga ilang gipangpalit sa nagkadaiyang klase sa mga prutas ug libre sab nga gipakaon atol sa "Kasadya sa Timpupo Festival" sa maong dakbayan. (EEF)