ANG Davao City Veterinarian's Office nagpahibalo sa mga Dabawenyo nga sila motuyok sa mga barangay sa siyudad sa Davao aron kapunon ang mga iro ug iring.
Kini libre nga ginahino sa CityVet aron makubsan ang populasyon sa mga iro ug iring nga maoy nag-unang tinubdan sa rabies.
Sumala sa pahibalo, ang mga naka-eskedyul kagahapon, Enero 11, 2024 mao ang Brgy. Matina Pangi, Talomo District; samtang sa Enero 23 sa Brgy. Indangan, Buhangin District.
Gawas niini nga mga eskedyul naa sab kaugalingon nga eskedyul ang ubang barangay diin ang mas maayo moadto sa matag barangay, mangutana sa mga nakatakda nga eskedyul.
Una kapunon ang iring ug iro kinahanglan nga vaccinated ug updated na kini sa anti-rabies, himsog alang sa surgery, kinahanglan ang edad upat ka bulan pataas, bisan unsa nga breed, ug kini andam nga magpakasta (naga-heat na).
Kinahanglan sab nga wala pa kini sila nakakaon gikan alas 8 sa gabii, usa ka adlaw una ang operasyon, ug nakaligo na sab ang pets.
Sa dugang mga pangutana mamahimong makig-alayon sa matag barangay.