GILUSAD sa Department of Transportation (DOTr) ang Libreng Sakay program sa Dakbayan sa Davao niadtong Hulyo 24, 2025.
Ang Libreng Sakay sa dakbayan maggamit sa walo ka mga bus atol sa peak hours aron paghatud sa mga sumasakay sa Roxas Avenue- Lasang Route (agi sa Sasa).
Ang paghatud o pagpasakay makahimo sa pagserbisyo og 8,000 sumasakay atol sa mga oras sa ilang pagpamasada gikan alas 6:00 sa buntag hangtud sa 9:00 sa buntag ug gikan sa alas 5:00 sa hapon padulong sa alas 8:00 sa gabii.
Ang paglunsad gitambongan ni Department of Transportation Secretary Vince Dizon kinsa niingon nga ang maong inisyatibo base sa mando ni President Ferdinand Marcos Jr., ngadto sa DOTr aron sa pagpangita og paagi sa pag-abag sa mga sumasakay kinsa naglisud nga makasakay atol sa mga "rush hours".
“As you can see, the cost and the inconvenience is really very difficult for our commuters on a daily basis all over the country, not just Davao. So the President instructed DOTr to find ways to provide some assistance to our commuters, to our students, to our senior citizens all over the country,” tug-an ni Dizon.
Ang libre nga programa sa sakay gilunsad sab sa Metro Manila gamit ang MRT (Manila Metro Rail Transit System) ug sa LRT (Light Rail Transit) apan sumala kang Dizon, buot sa Presidente nga Libreng Sakay ipatuman sab sa laing mga dagkong mga siyudad sa nasud.
Niadtong Hulyo 23, laing gipasiugda nga libreng sakay ang gilunsad sa Cebu.
Ang serbisyo, matud ni Dizon, himuon matag adlaw apil ang Sabado ug Dominggo. Ang programa dunay tinuig nga badyet nga P70-milyon ug magpadayon hangtud 2028.
“Malaking bagay ito because I am told that Lasang to downtown is one hundred pesos roundtrip so you can just imagine one hundred pesos per day saved by our students, by our workers,” pagtin-aw sa transportation secretary.
Ang inisyatibo sa Libreng Sakay sa DOTr magkomplemento sa kasamtangang Peak Hours Augmentation Bus System (PHABS) nga giimplementar sa lokal nga panggamhanan sa dakbayan nga nagpakatag og mga bus sa daghang ruta sa siyudad atol sa peak hours.
Ang lokal nga panggamhanan sa Davao nipalit sab og 10 low floor buses alang sa ilang libreng sakay program ubos sa Davao Interim Bus Service ug gilauman nga makabiyahe na sa katapusang kuwarter karong tuiga. (PR)