ALANG sa dili na gustong makabaton og anak, ang Davao City Health Office, pinaagi sa Population Division, subling nag-awhag sa mga Dabawenyo sa pagpahimulos sa libreng No Scalpel Vasectomy (NSV) nga serbisyo niini.
Ang NSV maoy usa sa permanente nga pamaagi sa pagplano sa pamilya nga gitanyag sa Population Division ngadto sa mga Dabawenyo.
Matag katapusang Biyernes sa bulan, ang Population Division mag-eskedyul og libreng serbisyo sa vasectomy sa Buhangin Vasectomy Center, diin ang bulan sa Hunyo, ang libre nga NSV gikatakda sa Hunyo 27.
Ang NSV usa ka non-invasive nga pamaagi nga molungtad og 10-15 ka minuto, ug nagkinahanglan og gamay nga aftercare.
Kini nga pamaagi sa pagplano sa pamilya naghatag usab og gamay nga peligro kung itandi sa Bilateral-Tubal Ligation (BTL), ug adunay 99.85 porsiyento nga rate sa pagka-epektibo.
Aduna usab temporaryong pamaagi sa pagplano sa pamilya nga gitanyag sa CHO ngadto sa publiko nga anaa sa ilang mga health centers sa distrito.
Ang mga Dabawenyo kinahanglan lamang nga moadto sa Population Division s CHO aron hisgutan pa ang mga detalye niining mga pamaagi sa pagplano sa pamilya.
Mahimo usab nga mokontak ang mga Dabawenyo sa City Population Office pinaagi sa ilang Facebook page (https://www.facebook.com/CityPopulationOfficeOfDavao), o email kanila sa citypopulationofficeofdavao@gmail.com; o bisitaha ang ilang main office nga nahimutang sa Camus St., Davao City.
Ang mga interesadong Dabawenyo nga gustong mo-avail sa libreng serbisyo sa NSV mahimong motawag o mo-text sa City Population Office sa 09952024680 alang sa dugang impormasyon. (Jeepy P. Compio/CIO)