COTABATO CITY - Gilutos karon sa militar ang mga terorista nga ilang na-engkwentro alas 12:15 sa udto niadtong Biyernes, Disyembre 1, 2023 sa probinsiya sa Maguindanao del Sur.
Ang mga napatay mga sakop sa Dawlah Islamiyah Philippine Terrorists.
Gibutyag ni 601st Brigade Commander Brigadier General Oriel Pangcog nga nakadawat sila og impormasyon gikan sa intelligence unit sa dapit nga nagtapok ang mga terorista.
Abtik nga milusad og airstrike ang Philippine Air Force (PAF) sa Baranga Mother Tuayan Datu Hoffer, Ampatuan Maguindanao del Sur.
Pag-abot sa alas 6 sa buntag, Disyembre 2, nagpahigayon og clearing operation ang mga sakop sa 40th Infantry Battalion Philippine Army diin ilang narekober ang patay nga lawas ni Kumander Ajid, kinsa giilang Ameer sa mga terorista ug napulo sa iyang mga sakop.
Nakuha sab sa posisyon sa mga napatay nga terorista ang duha ka M14 rifles, pito ka M16 Armalite rifles, usa ka RPG, tulo ka IED, mga bala, magasin ug mga personal nga kagamitan.
Sa kasamtangan hugtanon nga gibantayan sa Joint Task Force Central ug kapulisan ang posibleng panimalos sa mga terorista nga padayon nilang gilutos.