GISALIKWAY sa Davao City Police Office (DCPO) ang mga espekulasyon bahin sa presensiya sa gitawag og “ligis-bayad” extortion scheme sa dakbayan, human sa nag-viral nga video nga nagpakita sa usa ka lalaki nga nikamang ilawom sa sakyanan samtang naghunong kini sa traffic lights sayo ning semanaha.
Ang insidente, nahiabo niadtong Martes sa gabii, Abril 22, 2025, sa Buhangin, nagpakita nga ang lalaki nituyo sa pagpaligis sa kaugalingon sa sakyanan, nga nagpataas sa kabalaka sa online bahin sa posibleng pangilad. Apan gitin-aw sa pulis nga way sama niini nga modus operandi sa Davao City.
Sumala ni DCPO spokesperson Capt. Hazel Tuazon atol sa Davao City Peace and Security Press Corps media briefing, Abril 24, ang imbestigasyon sa Buhangin Police Station nagbutyag nga ang lalaki nga nalambigit usa ka "mentally challenged". Ingon pa sa opisyal nga ang indibiduwal nibiya sa balay nga wala mamatikdi sa mga miyembro sa pamilya ug silingan, ug dunay ginatumar nga medikasyon. Nangayo ang mga awtoridad og medical records gikan sa doktor nga nag-atiman sa pasyente ug naghuwat pa sa resulta sa psychiatric evaluation.
Gitin-aw ni Tuazon nga ang maong kaso "isolated" ug wala maglambigit og bisan unsa nga pangilkil og salapi. Iyang gipahimug-atan nga walay tarong og hunahuna nga tawo motuyo og paligis aron lang makakuwarta.
Samtang, mga awtoridad nagtaho nga pamilya sa biktima, nailhan isip alyas Rick, nihukom nga di mopasaka og kaso batok sa drayber nga nalambigit sa aksidente. Sumala sa taho gikan sa Traffic Section sa Buhangin Police Station, matag bahin nagkasasinabot nga maghusay sa presinto sa pulis human sa insidente.
Samtang ang tag-iya sa pickup truck maoy niabaga sa tanang galastohang medikal ni alyas Rick, kinsa kasamtangang gitambalanan sa Southern Philippines Medical Center (SPMC). (David Ezra Francisquete)