PADAYON pang gisubay sa mga awtoridad ang tinuod nga motibo sa niluog nga pagpatay sa batan-ong babaye sa giingong kapuyo sa iyaan niini gabii niadtong niadtong Lunes, Abril 28, 2025.
Subay sa taho, nakadawat matud pa og tawag ang Nabunturan Municipal Police Station (MPS) alas 7:40 sa gabii sa maong adlaw, pinaagi sa PNP hotline, gikan kang Kapitan Apolonio A. Monera Jr. sa Barangay Matilo ug nagtaho sa nadiskobrehan nga patay nga lawas sulod sa balay sa Purok 4 sa nahisgutang barangay.
Daling mihimo og pagsubay ang kapulisan sa Nabunturan MPS nga gipangulohan ni Police Lieutenant Colonel Eduard B. Jungco, Chief of Police, uban sa duty investigator, sa gitumbok nga lugar.
Sa dihang niabot sa dapit, ilang nakaplagan ang biktima, giilang si Angel Bonilla Ramirez, 12-anyos, kinsa wala na'y kinabuhi sulod sa kuwarto sa nahisgutang balay.
Base sa inisyal nga imbestigasyon, nasayran nga bandang alas 6:40 sa gabii, usa ka Loujean Venosa, kinsa kapuyo sa magulang lalaki sa biktima, nakadiskobre sa patay'ng lawas. Iyang nadiskobrehan ang biktima nga nagbuy-od sa higdaan nga gitabonan og habol. Sa dihang gitukas, iyang nakita ang biktima nga dunay dakong hiniwaan sa liog ug patay na matud pa niadtong higayona.
Mga lama sa dugo ang nakita sa higdaanan, sa bungbong, ug sa salog sa lawak.
Gilusad gilayon ang hot pursuit operation sa kapulisan sa Nabunturan MPS batok sa giingong suspek nga si Erwin Guillas Solis, kapuyo sa iyaan sa biktima.
Mga alas 12:20 sa buntag sa pagka-Abril 29, 2025, nadakpan ang suspek nga si Solis, 27-anyos, laborer, ug dayong lumulopyo sa Purok 4, Barangay Matilo pinaagi sa paningkamot sa kapulisan sa Nabunturan MPS, sa pakig-alayon uban ang Laak MPS ug mga personahe gikan sa 1st Davao de Oro Provincial Mobile Force Company (1st DDDOPMFC).
Sa pagsulat ning balita, ang suspek naa na sa kustodiya sa Nabunturan MPS alang sa dokumentasyon ug saktong disposisyon. Giandam na sab ang mga dokumento aron nga pasakaan siya og kaso pinaagi sa inquest proceedings. (Wenz G. Mendoza)