GENERAL SANTOS CITY -- Gisang-at niadtong Lunes, Hunyo 30, 2025, ang kasong pagpatay (Parricide) batok sa bana nga nilaslas sa ilog sa iyang asawa sa Norala, South Cotabato Province.
Giila ang biktima nga si alyas Gina samtang ang suspek mao si alyas Larry, mga nagpuyo sa Barangay San Miguel, Norala.
Sa taho sa South Cotabato Police Provincial Office, nasayran nga nagkalalis ang biktima ug ang iyang bana gumikan sa personal nga problema sa pamilya nga nisampot sa grabeng binayluay sa mga sakit nga pulong.
Tungod sa sobrang kasuko nikuha og sundang (lagaraw) ang suspek ug gilaslas ang liog sa iyang asawa.
Sa diha nga nakita sa suspek nga nagkadugo na ang asawa, iya sab nga gilaslas ang iyang liog.
Gisapupo ang magtiayon sa ilang mga paryente ug silingan ug gidala sa Noral District Hospital apan gideklara si Gina nga dead on arrival sa doktor samtang grabe si Larry.
Atubangon sa bana ang kasong parricide.
Sa pikas bahin, blangko pa ang mga awtoridad sa motibo sa pagpamusil sa duha ka army reservist alas 11:15 sa buntag, Dominggo, Hunyo 29, 2025, sa Datu Odin Sinsuat, Maguindanao del Norte.
Giila ang mga nakabsan sa kinabuhi nga sila Lidasan Tahir Nanaslong, 42-anyos, minyo, taga Barangay Sampao, Rajah Buayan, Maguindanao del Sur ug Thannie Undong Malang, 43-anyos, minyo ug nagpuyo sa Barangay Biniruan, Cotabato City.
Mga biktima giingong pulos mga army reservist nga nakabase sa PC Hill Cotabato City.
Gibutyag ni Maguindanao del Norte Police Provincial Office (MDNPPO) Director, Police Colonel Eleuterio Ricardo Jr. nga sakay ang mga biktima sa kotse gikan sa Cotabato City paingon sa Esperanza, Sultan Kudarat Province.
Apan pag-abot nila sa Barangay Bitu, Datu Odin Sinsuat kalit lang gipabuthan sa wala mailhing mga armadong lalaki gamit ang M16 Armalite rifles ug daling nisibat sakay sa motorsiklo ug mini van.
Gisapupo ang mga biktima sa mga nagresponde nga mga pulis ug gidala sa Cotabato Regional and Medical Center (CRMC) sa Cotabato City apan pulos gideklara sa mga doktor nga dead on arrival sa grabeng samad pinusilan nga naangkon.
Gipalawman pa sa kapulisan sa Datu Odin Sinsuat Municipal Police Station ang imbestigasyon sa pagpamusil patay sa mga biktima. (Edgar E. Fuerzas)