COTABATO CITY -- Giangkon karon sa Police Regional Office-Bangsamoro Autonomous Region (PRO-BAR) nga dakong hagit nila ang pagsumpo sa pagdagsang sa loose firearms sa Bangsamoro Region.
Gawas nga limitado ang likok sa checkpoints, daghan pa kuno ang angayang tagdon sa pagsumpo niini.
Gibutyag ni PRO-BAR regional director, Police Brigadier General Romeo Macapaz, nga bisan sa wala pa magsugod ang election period, nisumiter na sila og suwat ngadto sa Bangsamoro Transition Authority nga naghangyo nga mopasar sila og resolusyon nga maghatag og katungod sa kapulisan sa pag-abli sa bisan unsang mga sakyanan nga moagi sa mga checkpoints, ma-pribado, publiko man o mga sakyanan sa mga impluwensiyadong mga indibiduwal o politiko.
Ang PRO-BAR mihangyo usab og dugang 3,000 ka mga pulis nga motabang sa pagseguro sa mga polling precincts sa umaabot nga piniliay.
Apan giingong wala pa kini matubag tungod kay nag-recess pa ang sesyon sa BTA.
Gikanayon ni PBGen Macapaz nga tungod sa ilang limitado nga gahum, naglisud ang mga pulis sa mga checkpoints ilabi na sa mga impluwensiyadong tawo nga dili gustong moabli sa ilang mga sakyanan bisan og gipatuman ang gun ban.
Nalatid sa 1987 Constitution nga ang mga awtoridad limitado sa visual search lamang ug mahimo lang ang pag-abri sa sakyanan kung adunay search warrant.
Samtang ilang gihingusgan ang mga lakang nga gihimo sama sa pagpatrolya matag adlaw ug pagbutang og closed-circuit television (CCTV) cameras sa mga border controls sa Bangsamoro Autonomous Region in Muslim Mindanao (Barmm).
Gipakatap usab ang mga maneuvering force sa mga lugar nga adunay daghang kaso sa krimen. (Edgar E. Fuerzas)