ANG kagamhanang probinsiyal sa Davao de Oro nagbutyag nga niabot og kinatibuk-ang P195,821,087.50 nga danyos ang paghasi sa low-pressure area (LPA).
Sa datus nga gihatag sa probinsiya alas 8 sa buntag, Martes, Pebrero 6, 2024, moabot sa 280 ka mga balay ang nadanyos, 160 niini totally damaged ug 120 partially damaged. Ang kinatibuk-ang danyos niabot og P780,000.
Kabahin sa inprastraktura, kantidad sa danyos niabot og P110,407,000. Base sa paghimay-himay, unom ka mga poste sa kuryente ang apektado, samtang walo ka dagkong tubo sa tubig ang nadaut, ug duha ka tore sa telecommunication apektado sab.
Apil nga apektado mao ang 125 ka dalan (92 niini nalimpyohan na ug maagian na sa tanang matang sa behikulo), 18 tulay, ug duha ka imburnal.
Ang danyos sa agrikultura niabot og gibanabana nga P84,634,087.50.
Samtang 43,387 ka pamilya gilangkuban og 160,307 indibiduwal gikan 11 munisipalidad sa mga probinsiya nga grabeng naapektuhan sa pagbaha ug pagdahili sa yuta.
Nadislokar nga mga pamilya (internally) niabot og 43,387, samtang 15,786 ka pamilya naa sulod sa evacuation centers, ug 27,601 pamilya naa sa gawas sa evacuation centers.
Apil sa mga kasuwalidad, 13 ang gideklarang patay, samtang duha nawala, ug siyam ang naangol.
Gikanayon ni Provincial Disaster Risk Reduction and Management Office (PDRRMO) head Joseph Randy M. Loy sa press conference, Martes sa buntag, nga ang LPA nakahasi sa probinsiya ilabi na gyud sa mga ubos nga bahing mga lugar nga kasagaran nang bahaon.
Dugang pa niya nga ang kagamhanang probinsiyal wala pa magdeklara og a state of calamity alang sa LPA tungod nakober pa sa deklarasyon niadtong Enero 24 tungod sa shear line.
Gisulti ni Governor Dorothy Gonzaga nga ang probinsiya nga inisyal na nga nag-alokar og P12 milyon gikan sa Quick Response Fund (QRF) alang sa pagkaon ug non-food assistance sama sa hygiene kits ug construction materials ngadto sa mga naapektuhan nga pamilya.
Dugang pa niya nga ang ubang mga ahensiya ug ubang mga local government units (LGU) nisaad sab og donasyon ngadto sa probinsiya.
Gitin-aw sa gobernadora nga ang mga barangays ug mga munisipyo dunay kaugalingon nilang QRF, nga ilang magamit atol sa kalamidad.