NATUSAK sa bala ang sakyanan sa magtutudlo ug nasamdan kini sa dihang gibanhigan sa wala pa mailhing mga mamumuno alas 9 sa buntag, Marso 13, 2025 sa Acacia Street, Juna Subdivision, Barangay 76-A, Davao City.
Wala gibutyag sa kapulisan ang pangalan sa biktima nga usa ka magtutudlo, 51 anyos, taga Gem Village, Maa, Davao City.
Sa inisyal nga imbestigasyon sa Davao City Police Office (DCPO), gikan nag-seminar ang biktima sa Commission on Elections (Comelec) ug padulong kini nga moadto sa nakatakda nga hearing sa barangay.
Ang nasampit nga hearing sa barangay subay matud pa sa reklamo nga koleksyon sa kuwarta nga misangko sa estafa complaint ngadto sa Barangay Maa nga misumada og P6 milyon.
Nasayran nga sa Juna Subdivision pa lang, gitaparan na ang biktima sa nakamotorsiklo nga suspek.
Dihang nakahigayon na ang suspek, gipaulanan kini og bala diin naningkamot sa pagpadagan ang biktima padung sa opisina sa Central 911 aron makapangayo og tabang.
Gitan-aw sa kapulisan ang anggulo sa giingong nabulilyaso niini nga kuwarta, diin ang kapulisan sa kasamtangan mihimo na og usa ka hot pursuit operation batok sa mga suspek.
Gikustodiya karon sa Ecoland Police Station ug sa Davao City Forensic Unit 11 ang Nissan Terra sa biktima ug ang mga basiyo sa bala nga narekober sa crime scene.
Anaa na sa luwas nga kahimtang ang biktima sud sa balay-tambalanan. (Jeepy P. Compio)